भारत विरुद्ध दक्षिण आफ्रिका यांच्यातील एकदिवसीय मालिकेतील दुसरा सामना रायपूर येथील शहीद वीर नारायण सिंग आंतरराष्ट्रीय स्टेडियमवर खेळला जात आहे. या सामन्यादरम्यान दक्षिण आफ्रिकेच्या संघाला मोठा धक्का बसला आहे. वेगवान गोलंदाज नांद्रे बर्गरला गोलंदाजी करताना दुखापत झाली. त्याच्या मांडीच्या स्नायूंना दुखापत झाली आणि तो मैदानाबाहेर गेला. त्यानंतर तो गोलंदाजी करण्यासाठी परतला नाही. त्याच्या अनुपस्थितीत एडेन मार्करामने त्याचा स्पेल पूर्ण केला.
भारतीय डावाच्या 39व्या षटकात ही घटना घडली. विराट कोहलीने त्या षटकाच्या पहिल्या चेंडूवर एक धाव घेण्यासाठी कव्हरकडे चेंडू खेळवला. त्यानंतर बर्गर त्याच्या रन-अपवर परतला, परंतु तो परत येताच त्याच्या चेहऱ्यावर वेदना स्पष्टपणे दिसून येत होत्या. त्यानंतर तो लंगडत उजव्या गुडघ्याला धरून बसला. दक्षिण आफ्रिकेचे फिजिओ ताबडतोब मैदानावर आले. तपासणीनंतर बर्गरला मैदानाबाहेर नेेले. तो त्याचा षटकही पूर्ण करू शकला नाही. कर्णधार टेम्बा बावुमाला एडेन मार्करामला तो षटक पूर्ण करण्यास भाग पाडावे लागले.
ईएसपीएनक्रिकइन्फोमधील वृत्तानुसार, बर्गरची तपासणी करण्यात आली आणि त्याला अजूनही उजव्या मांडीच्या स्नायूंमध्ये अस्वस्थता जाणवत आहे. दक्षिण आफ्रिकेची वैद्यकीय टीम त्याच्यावर लक्ष ठेवून आहे. त्याच्या दुखापतीची तीव्रता अद्याप कळलेली नाही. तथापि, तो तिसऱ्या एकदिवसीय सामन्यातून बाहेर पडण्याची शक्यता आहे. बर्गर टी-20 संघाचा भाग नाही. अँरिच नोर्किया खेळेल. अशा परिस्थितीत, गरज पडल्यास नोर्कियाला तिसऱ्या एकदिवसीय सामन्यासाठी संघात समाविष्ट केले जाऊ शकते. या दौऱ्यावर आफ्रिकन संघ कागिसो रबाडाशिवाय खेळत आहे.
नांद्रे बर्गरने 6.1 षटकांत 43 धावा देत यशस्वी जयस्वालची विकेट घेतली. रायपूर एकदिवसीय सामन्यात भारतीय फलंदाजांनी शानदार फलंदाजी केली. प्रथम फलंदाजी करताना टीम इंडियाने 358 धावा केल्या. विराट कोहलीने 93 चेंडूत 102 धावा केल्या, तर ऋतुराज गायकवाडने 83 चेंडूत 105 धावा केल्या. कर्णधार केएल राहुलने 66 धावांची नाबाद खेळी केली. दक्षिण आफ्रिकेकडून नांद्रे बर्गर व्यतिरिक्त मार्को जेन्सनने दोन आणि लुंगी एनगिडीने एक विकेट घेतली.
Comments are closed.