या वर्षी अनेक नव्या कलाकारांनी चित्रपट आणि ओटीटीच्या माध्यमातून मनोरंजनसृष्टीत पाऊल ठेवले. राषा ठडानी, जुनैद खान, खुशी कपूर यांसारख्या स्टारकिड्सनी आपली ओळख निर्माण केली. आता प्रेक्षकांचे लक्ष २०२६ कडे लागले आहे, कारण येत्या वर्षात बॉलीवूडमध्ये अनेक नवे चेहरे पदार्पण करणार आहेत. यामध्ये स्टार किड्ससोबतच साऊथ इंडस्ट्रीमधील लोकप्रिय कलाकारांचाही समावेश आहे.
सिमर भाटिया – अक्षय कुमार यांची भाची सिमर भाटिया २०२६ मध्ये श्रीराम राघवन यांच्या ‘एकवीस’ (Ikkees)या चित्रपटातून बॉलीवूडमध्ये पदार्पण करणार आहेत. या चित्रपटात तिच्यासोबत अमिताभ बच्चन यांचा नातू अगस्त्य नंदा मुख्य भूमिकेत दिसणार आहे. जयदीप अहलावत यांचीही महत्त्वाची भूमिका आहे
यशवर्धन आहूजा – गोविंदा यांचा मुलगा यशवर्धन आहूजा एका अनटायटल्ड लव्ह स्टोरीद्वारे मोठ्या पडद्यावर एन्ट्री करणार आहे. या चित्रपटाचे दिग्दर्शन राष्ट्रीय पुरस्कार विजेते तेलुगू दिग्दर्शक साई राजेश करत असून २०२६ मध्ये हा सिनेमा प्रदर्शित होण्याची शक्यता आहे.
नाओमिका सरन – ट्विंकल खन्नाची भाची नाओमिका सरन हिलाही मॅडॉक फिल्म्सने साइन केले आहे. ती सिमर भाटियाप्रमाणेच अगस्त्य नंदासोबत पदार्पण करणार असल्याची चर्चा आहे. २०२६ मध्ये तिचा पहिला चित्रपट प्रेक्षकांच्या भेटीला येणार आहे.
अगस्त्य नंदा – अमिताभ बच्चन यांचा नातू अगस्त्य नंदा झोया अख्तरच्या *‘द आर्चीज’*नंतर आता थिएटर रिलीजमधून प्रेक्षकांसमोर येणार आहे. ‘इक्कीस’ या वॉर-बेस्ड चित्रपटात तो परमवीर चक्र विजेते मेजर अरुण खेत्रपाल यांची भूमिका साकारणार आहे. हा चित्रपट १ जानेवारी २०२६ रोजी प्रदर्शित होणार असून, धर्मेंद्र यांचा हा शेवटचा चित्रपट असल्याचे सांगितले जात आहे.
मेधा राणा – ओटीटीवर ओळख निर्माण केलेली अभिनेत्री मेधा राणा आता सनी देओलच्या ‘बॉर्डर २’ या चित्रपटातून मोठ्या पडद्यावर पदार्पण करणार आहे. या चित्रपटात ती वरुण धवनसोबत दिसणार आहे. याआधी तिने ‘लंडन फाइल्स’ या वेबसीरिजमध्ये अर्जुन रामपालसोबत काम करत प्रेक्षकांची दाद मिळवली होती.
सुहाना खान – शाहरुख खान यांची मुलगी सुहाना खान हिने २०२३ मध्ये नेटफ्लिक्सवरील ‘द आर्चीज’ मधून अभिनयात पाऊल ठेवले होते. आता ती २०२६ मध्ये वडील शाहरुख खान यांच्यासोबत ‘किंग’ या चित्रपटातून मोठ्या पडद्यावर झळकणार आहे. चित्रपटाची अधिकृत रिलीज डेट अद्याप जाहीर झालेली नाही.
श्रीलीला – तेलुगू सिनेसृष्टीतील लोकप्रिय अभिनेत्री श्रीलीला टी-सीरिजच्या ‘मेरी जिंदगी है तू’ या चित्रपटातून बॉलीवूडमध्ये पदार्पण करणार आहे. या चित्रपटात ती कार्तिक आर्यनच्या अपोजिट दिसणार आहे. ‘धमाका’, ‘भगवंत केसरी’, ‘गुंटूर कारम’ यांसारख्या हिट चित्रपटांमुळे श्रीलीलाची मोठी फॅनफॉलोइंग आहे.
साई पल्लवी – डॉक्टर ते अभिनेत्री असा प्रवास केलेली साई पल्लवी आता बॉलीवूडमध्ये पदार्पणासाठी सज्ज झाली आहे. रणबीर कपूरच्या ‘रामायण’ चित्रपटातून ती हिंदी सिनेसृष्टीत प्रवेश करणार असून हा भव्य चित्रपट दिवाळी २०२६ रोजी प्रदर्शित होणार आहे. ‘प्रेमम’, ‘फिदा’, ‘लव्ह स्टोरी’, ‘श्याम सिंघा रॉय’ आणि ‘गार्गी’सारख्या चित्रपटांतून तिने आपल्या अभिनयाची छाप सोडली आहे.
दैनिक बोंबाबोंबचा व्हॉट्सॲप ग्रुप जॉईन करण्यासाठी या लिंकवर क्लिक करा
हेही वाचा
Comments are closed.