काश्मीरमध्ये मोठा कट उधळून लावला.

वृत्तसंस्था/ श्रीनगर, नवी दिल्ली

जम्मू काश्मीरमधील सुरक्षा दलांनी पुन्हा एकदा दहशतवादी संघटनांचा मोठा कट उधळला आहे. उत्तर काश्मीरमधील सोपोर-बांदीपोरा मार्गावर मंगणीपोराजवळ एक शक्तिशाली आयईडी (इम्प्रोवाइज्ड एक्सप्लोझिव्ह डिव्हाइस) निकामी करण्यात आला. या घटनेनंतर गुप्तचर संस्थांनी जम्मू काश्मीरमध्ये सुरू असलेल्या दहशतवादी धोक्याबाबत अलर्ट जारी केला आहे. सुरक्षा संस्थांच्या मते, सध्या जम्मू प्रदेशात 30 हून अधिक पाकिस्तानी दहशतवादी सक्रिय आहेत. हे दहशतवादी हिवाळी पर्यटन हंगामाचा फायदा घेऊन घातपात घडवण्याच्या तयारीत असल्याने सुरक्षा दलांकडून संशयित कारवाया रोखण्यासाठी जोरदार रणनीती आखली जात आहे.

आयईडीची माहिती मिळताच, बॉम्ब निकामी पथक घटनास्थळी पोहोचले आणि त्यांनी निक्रियीकरण कार्य सुरू केले. खबरदारीचा उपाय म्हणून सदर मार्गावरील वाहतूक पूर्णपणे थांबवण्यात आली होती. गुप्तचर यंत्रणांकडून मिळालेल्या माहितीच्या आधारे सुरक्षा यंत्रणांनी आयईडी स्फोटके नष्ट करण्यासाठी विशेष मोहीम हाती घेतली होती. अखेरीस सापडलेली स्फोटके निष्क्रीय केल्यामुळे मोठा धोका टळला आहे. याप्रकरणी अधिक आणि सखोल तपास सुरू असल्याची माहिती सुरक्षा विभागाच्या अधिकाऱ्यांकडून देण्यात आली.

भारतीय लष्कराने हिवाळ्यातील तथाकथित ‘हंगामी शांतता’ पूर्णपणे नाकारली आहे. 21 डिसेंबरपासून सुरू झालेल्या हिवाळ्यातील सर्वात कठोर 40 दिवसांच्या ‘चिल्लई कलान’ दरम्यान लष्कराने दहशतवाद्यांवरील लक्ष आणखी वाढवले आहे. संरक्षण सूत्रांच्या मते, चालू असलेल्या कारवायांमुळे, दहशतवादी आता किश्तवार आणि दोडाच्या उंच आणि मध्य-पर्वतीय भागात माघार घेत आहेत. या भागात स्थानिक नागरिकांची हालचाल कमी असल्यामुळे दहशतवादी येथे बस्तान मांडण्याच्या तयारीत असल्याचे समजते. तथापि, सुरक्षा दले पूर्णपणे अलर्ट मोडवर आली असून पूर्ण दक्षता घेतली जात आहे.

बर्फाळ प्रदेशात गस्त वाढवली

दहशतवादी पुन्हा एकत्र येण्यासाठी आणि सुरक्षा दलांचे लक्ष चुकवण्यासाठी या दुर्गम भागात लपून बसले आहेत. तथापि, ही रणनीती उधळण्यासाठी लष्कराने बर्फाळ आणि उंच प्रदेशातील आपली गस्त वाढवली आहे. चिल्लई कलान सुरू होताच दहशतवाद्यांवर सतत देखरेख ठेवण्यासाठी फॉरवर्ड हिवाळी तळ आणि तात्पुरत्या निरीक्षण चौक्या स्थापन करण्यात आल्या आहेत. पर्वत शिखरे, जंगले आणि दुर्गम दऱ्यांमध्ये सैन्य गस्त नियमित शोध मोहिमा राबवत आहेत. या धोरणाचा उद्देश दहशतवाद्यांना कठीण प्रदेशात रोखणे, त्यांच्या पुरवठा मार्गात अडथळा आणणे आणि त्यांना लोकसंख्या असलेल्या भागात जाण्यापासून रोखणे हा आहे.

विविध यंत्रणांनी समन्वय वाढवला

दहशतवादविरोधी कारवायांमध्ये लष्कर, जम्मू काश्मीर पोलीस, सीआरपीएफ, विशेष ऑपरेशन्स ग्रुप, वन विभागाचे रक्षक आणि ग्राम संरक्षण रक्षक यांच्यात समन्वय वाढविण्याचे निर्देश देण्यात आले आहेत. दहशतवाद्यांच्या हालचालींचे अचूक आकलन करण्यासाठी आणि वेळेवर लक्ष्यित कारवाई सुनिश्चित करण्यासाठी गुप्तचर यंत्रणांचे संयुक्तपणे विश्लेषण केले जात आहे. येत्या काही दिवसांत कारवाईची गती कमी केली जाणार नाही. तसेच कोणत्याही परिस्थितीत दहशतवाद्यांना सुरक्षित आश्रयस्थाने स्थापन करण्याची परवानगी दिली जाणार नाही, असा सुरक्षा यंत्रणांचा दावा आहे.