बीसीसीआयची मोठी घोषणा! वॉशिंग्टन सुंदरच्या जागी 'या' खेळाडूची टीम इंडियात निवड, पहिल्यांदाच भारताकडून खेळणार

भारतीय क्रिकेट नियामक मंडळाने BCCI वॉशिंग्टन सुंदरला भारत विरुद्ध न्यूझीलंड एकदिवसीय मालिकेतून वगळल्याची अधिकृतपणे पुष्टी केली आहे. वॉशिंग्टन सुंदरला वडोदरा येथे झालेल्या पहिल्या एकदिवसीय सामन्यादरम्यान दुखापत झाली. गोलंदाजी करताना त्याला दुखापत झाली, ज्यामुळे पाच षटके टाकल्यानंतर त्याला मैदान सोडावे लागले. जरी तो गरज पडल्यास फलंदाजी करण्यासाठी परतला असला तरी, त्याच्या चेहऱ्यावर वेदना स्पष्टपणे दिसून येत होत्या. सामन्यानंतर सुंदरचे स्कॅन करण्यात आले, ज्यामध्ये त्याच्या दुखापतीची पुष्टी झाली आणि तो मालिकेतून बाहेर पडला. त्याच्या जागी आयुष बदोनीचा संघात समावेश करण्यात आला आहे. बदोनी पहिल्यांदाच भारतीय ड्रेसिंग रूमचा भाग असेल.

वॉशिंग्टन सुंदरच्या दुखापती आणि त्याच्या जागी निवडीची माहिती देताना बीसीसीआयने एका प्रसिद्धीपत्रकात लिहिले आहे की, “रविवारी वडोदरा येथील बीसीए स्टेडियमवर न्यूझीलंडविरुद्धच्या पहिल्या एकदिवसीय सामन्यादरम्यान गोलंदाजी करताना भारताचा अष्टपैलू खेळाडू वॉशिंग्टन सुंदरला डाव्या खालच्या बरगडीत तीव्र वेदना जाणवल्या. त्याचे पुढील स्कॅन केले जातील, त्यानंतर बीसीसीआयची वैद्यकीय टीम तज्ञांचा सल्ला घेईल.”