मोदी म्हणजे गझनीचे मेहमूद, काँग्रेसचा निशाणा

काशीतील प्राचीन मंदिरे आणि मणिकर्णिका घाटावर बुलडोझर चालवल्यावरून पंतप्रधान नरेंद्र मोदी यांच्यावर चौफेर टीका होत आहे. मोदी म्हणजे हिंदूंची मंदिरे पाडणारे गझनीचे मेहमूद आहेत, अशी टीका काँग्रेस प्रदेशाध्यक्ष हर्षवर्धन सपकाळ यांनी आज केली.

हर्षवर्धन सपकाळ यांनी काशीतील प्राचीन मंदिरे आणि पुण्यश्लोक अहिल्यादेवी होळकर यांनी बांधलेला मनकर्णिका घाट पाडल्यावरून भारतीय जनता पक्ष आणि पंतप्रधान मोदींवर निशाणा साधला आहे. भाजपला देशाचा इतिहास पुसून स्वत:चा इतिहास रचायचा असल्याने हिंदूंच्या मंदिरांना लक्ष्य केले जात आहे, असे सपकाळ म्हणाले. गझनीच्या मेहमूदाने अशाच प्रकारे हिंदुस्थानातील मंदिरे पाडली होती, सोमनाथ मंदिराची लूट केली होती, मोदी त्यापेक्षा वेगळे नाहीत, असे सपकाळ म्हणाले. पाडकाम करताना अहिल्यादेवींचा पुतळाही तोडला गेल्याचा आरोप भाजपवर होत आहे.
काशीला जाऊन

आत्मक्लेश आंदोलन करणार

वेळ पडली तर काँग्रेस कार्यकर्ते काशी येथे जाऊन आत्मक्लेश आंदोलन करतील, असा इशारादेखील सपकाळ यांनी दिला आहे. भाजपला मणिकर्णिका घाटाची दुरुस्ती करता आली असती; पण पूर्ण घाटावरच बुलडोझर चालवला गेला, त्यावरून भाजपचा बेगडी हिंदुत्ववाद समोर आला आहे, असे ते म्हणाले.