भारत आणि न्यूझीलंड दरम्यान 5 सामन्यांची टी-20 मालिका खेळली जात आहे. मालिकेतील चौथा सामना 28 जानेवारीला विशाखापट्टनम येथे खेळवला जाईल. भारतीय संघाने आधीच ही मालिका 3-0 ने आपल्या नावे केली आहे. भारत आणि न्यूझीलंडमधील या सामन्याच्या थेट प्रक्षेपणाचा आनंद चाहते विनामूल्य घेऊ शकतात.
भारत आणि न्यूझीलंडमधील चौथा टी-20 सामना बुधवार, (28 जानेवारी 2026) रोजी विशाखापट्टनमच्या ACA-VDCA क्रिकेट स्टेडियमवर खेळला जाईल. भारतीय वेळेनुसार टॉस (फेक) संध्याकाळी 6:30 वाजता होईल, तर सामन्याला 7 वाजता सुरुवात होईल.
भारतात या सामन्याचे थेट प्रक्षेपण ‘स्टार स्पोर्ट्स नेटवर्क’वर केले जाईल, तर सामन्याची लाईव्ह स्ट्रीमिंग ‘जियोहॉटस्टार’ (JioHotstar) ॲप आणि वेबसाइटवर उपलब्ध असेल. याशिवाय, हा सामना ‘डीडी स्पोर्ट्स’ नेटवर्कवर विनामूल्य पाहता येईल.
चौथ्या टी-20 सामन्यात जसप्रीत बुमराहला विश्रांती दिली जाऊ शकते. बुमराहचा वर्कलोड आणि आगामी टी-20 वर्ल्ड कप 2026 लक्षात घेता, ‘जस्सी’च्या जागी अर्शदीप सिंगला संधी मिळण्याची शक्यता आहे. या व्यतिरिक्त भारतीय संघात बदल होण्याची शक्यता कमी आहे.
संजू सॅमसनचा फॉर्म भारतीय संघासाठी चिंतेचा विषय ठरत आहे. न्यूझीलंडविरुद्ध आतापर्यंत झालेल्या 3 सामन्यात तो फ्लॉप ठरला आहे. पहिल्या सामन्यात 10, दुसऱ्या सामन्यात 6 आणि तिसऱ्या सामन्यात तो ‘गोल्डन डक’वर (पहिल्याच चेंडूवर) बाद झाला. टी-20 वर्ल्ड कप 2026 पूर्वी संजूला फॉर्ममध्ये परतावे लागेल, अन्यथा टीम इंडियाला याचे नुकसान सोसावे लागू शकते.
Comments are closed.