भारत आणि पाकिस्तान यांच्यातील टी-२० वर्ल्ड कप २०२६ मधील महामुकाबला १५ फेब्रुवारीला खेळवला जाणार आहे. या सामन्यापूर्वी चाहत्यांसाठी एक वाईट बातमी समोर आली आहे. १४ फेब्रुवारीला कोलंबोमध्ये मुसळधार पाऊस पडत आहे. अशा परिस्थितीत, पावसामुळे हा सामना रद्द देखील होऊ शकतो. १५ फेब्रुवारीलाही मुसळधार पावसाची शक्यता वर्तवण्यात आली आहे.
हवामान खात्याच्या अंदाजानुसार, १५ फेब्रुवारीला संध्याकाळी ६ वाजता पाऊस पडण्याची शक्यता ५१ टक्के आहे, तर ७ वाजता ५७ टक्के आणि रात्री ८ वाजता ६२ टक्के पावसाची शक्यता आहे. भारत आणि पाकिस्तानमधील हा सामना भारतीय वेळेनुसार संध्याकाळी ७:०० वाजता सुरू होईल. ‘ॲक्युवेदर’च्या अहवालानुसार, १५ फेब्रुवारीला तापमान २९ अंश सेल्सिअस राहील, आर्द्रता ७५ टक्के असेल आणि ताशी १६ किलोमीटर वेगाने वारे वाहतील.
भारत आणि पाकिस्तान सामन्यासाठी कोणताही ‘रिझर्व्ह डे’ (राखीव दिवस) ठेवण्यात आलेला नाही. अशा परिस्थितीत जर पावसामुळे सामना रद्द झाला, तर दोन्ही संघांना १-१ गुण दिला जाईल. मात्र, पंच सामन्याचा निकाल लावण्यासाठी पुरेपूर प्रयत्न करतील. सध्या भारत आणि पाकिस्तानने टी-२० वर्ल्ड कपमध्ये प्रत्येकी २ सामने खेळले आहेत आणि दोन्ही संघांनी आपल्या दोन्ही सामन्यांत विजय मिळवला आहे. ग्रुप ‘A’ मध्ये भारतीय संघ ४ गुणांसह अव्वल स्थानी आहे, तर पाकिस्तानचा संघ देखील ४ गुणांसह दुसऱ्या क्रमांकावर आहे. भारताचा रन रेट पाकिस्तानपेक्षा सरस आहे.
Comments are closed.