आंतरराष्ट्रीय क्रिकेटमध्ये मोठा उलटफेर होता होता वाचला; इटलीने इंग्लंडला दिली चांगलीच टक्कर, सामना झाला अटीतटीचा

​टी२० वर्ल्ड कपच्या इतिहासातील सर्वात मोठा उलटफेर होता होता वाचला. स्पर्धेतील २९ वा साखळी सामना कोलकाता येथील ईडन गार्डन्सवर इंग्लंड आणि इटली दरम्यान खेळला गेला. श्वास रोखून धरायला लावणाऱ्या या अटीतटीच्या सामन्यात इंग्लंडने इटलीवर २४ धावांनी विजय मिळवला. इटलीच्या आधी नेपाळ संघानेही इंग्लंडसमोर मोठे आव्हान उभे केले होते.

​या रोमांचक सामन्यात इंग्लंडने प्रथम फलंदाजी करताना २० षटकांत ७ बाद २०२ धावा धावफलकावर लावल्या. संघासाठी विल जॅक्सने सर्वात मोठी खेळी खेळली; त्याने २२ चेंडूत ३ चौकार आणि ४ षटकारांच्या मदतीने नाबाद ५३ धावा केल्या.

​विजयाचा पाठलाग करण्यासाठी उतरलेला इटलीचा संघ २० षटकांत १७८ धावांवर सर्वबाद झाला. इटलीसाठी बेन मनेन्टीने तुफानी फलंदाजी करत २५ चेंडूत ४ चौकार आणि ६ षटकारांच्या जोरावर ६० धावा ठोकल्या. त्याच्या या खेळीमुळे संघाला विजय तर मिळाला नाही, पण सामन्यात एक वेळ अशी आली होती जेव्हा इटलीचा विजय पूर्णपणे शक्य वाटत होता.

​शेवटच्या २ षटकांत इटलीला विजयासाठी फक्त ३० धावांची गरज होती. इथून संघाचा विजय सोपा वाटत होता, कारण ३ षटकांत ५१ धावा हव्या असताना १८ व्या षटकात २१ धावा निघाल्या होत्या. त्यानंतर असे वाटले की २ षटकांत ३० धावा करून इटली सहज विजय मिळवेल.

​परंतु, १९ वे षटक घेऊन आलेल्या सॅम करनने इंग्लंडचे पुनरागमन करून दिले. त्याने आपल्या षटकात केवळ ५ धावा देऊन १ बळीही घेतला. करनच्या या षटकाने इंग्लंडला विजयाच्या उंबरठ्यावर आणून ठेवले. आता शेवटच्या षटकात इटलीला २५ धावांची गरज होती. मात्र, इटलीचा संघ शेवटच्या षटकात एकही धाव काढू शकला नाही आणि उरलेले २ बळी गमावून सर्वबाद झाला.

​या विजयासोबतच इंग्लंडने ‘सुपर-८’ मध्ये प्रवेश केला आहे. आता ‘ग्रुप-सी’ मधून वेस्ट इंडिज आणि इंग्लंड हे दोन संघ सुपर-८ साठी पात्र ठरले आहेत.