टी-२० वर्ल्ड कप २०२६ चा ३८ वा लीग सामना श्रीलंका आणि झिम्बाब्वे दरम्यान कोलंबोच्या आर. प्रेमदासा स्टेडियमवर खेळला गेला. या सामन्यात झिम्बाब्वेने ६ गडी राखून विजय मिळवत टी-२० वर्ल्ड कपमध्ये एक मोठा विक्रम प्रस्थापित केला. या स्पर्धेतील झिम्बाब्वेचा हा सलग तिसरा विजय ठरला. चला तर मग जाणून घेऊया, या विजयासोबत झिम्बाब्वेने कोणता ‘महारिकॉर्ड’ आपल्या नावावर केला.
या सामन्यात श्रीलंकेने प्रथम फलंदाजी करताना २० ओव्हरमध्ये १७८/७ धावा फलकावर लावल्या होत्या. प्रत्युत्तरात धावांचा पाठलाग करण्यासाठी उतरलेल्या झिम्बाब्वेने १९.३ ओव्हरमध्ये १८२/४ धावा करून विजय आपल्या खिशात टाकला.
टी-२० वर्ल्ड कपच्या इतिहासात श्रीलंकेविरुद्धचा हा दुसरा सर्वात मोठा यशस्वी ‘रन चेस’ (धावांचा पाठलाग) ठरला. या यादीत पहिल्या क्रमांकावर १९० धावांचा यशस्वी पाठलाग आहे, जो इंग्लंडने २०१४ च्या स्पर्धेत केला होता. अशा प्रकारे झिम्बाब्वेने श्रीलंकेचा पराभव करून हा महाविक्रम नोंदवला.
यासोबतच आर. प्रेमदासा स्टेडियमवर टी-२० इंटरनॅशनलमध्ये केलेला हा दुसरा सर्वात मोठा यशस्वी पाठलाग ठरला. या मैदानावर सर्वात मोठा यशस्वी पाठलाग २१५ धावांचा आहे, जो बांगलादेशने २०१८ च्या निदहास ट्रॉफीमध्ये केला होता. अशा प्रकारे झिम्बाब्वेने एका दगडात दोन पक्षी मारत आणखी एका मोठ्या विक्रमावर आपले नाव कोरले.
विशेष म्हणजे, ग्रुप स्टेजमध्ये झिम्बाब्वेने एकही सामना गमावला नाही. संघाने ओमान, ऑस्ट्रेलिया आणि श्रीलंका यांच्याविरुद्ध विजय मिळवला. तर टीमचा तिसरा सामना (आयर्लंड विरुद्ध) पावसामुळे टॉस न होताच रद्द करण्यात आला होता.
झिम्बाब्वेने ग्रुप स्टेजचे सर्व सामने श्रीलंकेत खेळले. आता हा संघ सुपर-८ चे सामने भारताच्या भूमीवर खेळणार आहे. सुपर-८ मध्ये झिम्बाब्वेची लढत भारताशी देखील होणार आहे. पुढील टप्प्यात म्हणजेच सुपर-८ मध्ये झिम्बाब्वेचा पहिला सामना २३ फेब्रुवारीला वेस्ट इंडिजविरुद्ध, दुसरा सामना २६ फेब्रुवारीला भारताविरुद्ध आणि तिसरा सामना १ मे रोजी दक्षिण आफ्रिकेविरुद्ध होणार आहे.
Comments are closed.