अनेक विमानतळांवर चेक-इन व्यत्यय

दिल्लीसह देशभरातील अनेक ठिकाणी गोंधळ

वृत्तसंस्था/नवी दिल्ली

दिल्लीच्या इंदिरा गांधी आंतरराष्ट्रीय विमानतळासह देशात विविध विमानतळांवरील चेक-इन सिस्टीममध्ये गुरुवारी सकाळी अचानक बिघाड झाल्यामुळे प्रवाशांची मोठी गैरसोय झाली. नेव्हिटायर सर्व्हरमधील तांत्रिक बिघाडामुळे ही समस्या उद्भवली. सकाळी 6:45 ते 7:28 पर्यंत जवळपास 43 मिनिटे या यंत्रणेमध्ये व्यत्यय आल्यानंतर इंडिगो, अकासा एअर, स्पाइसजेट आणि एअर इंडिया एक्स्प्रेस सारख्या प्रमुख विमान कंपन्यांच्या चेक-इन आणि बोर्डिंग प्रक्रियेवर गंभीर परिणाम झाला.

या असुविधेमुळे प्रवाशांना रांगांमध्ये ताटकळत उभे रहावे लागले. संगणकीय यंत्रणा डाउन असल्याने विमानतळ कर्मचाऱ्यांना मॅन्युअल चेक-इनचा अवलंब करावा लागला. ही सुविधा फारच संथगतीने सुरू राहिल्यामुळे काउंटरवर गोंधळ निर्माण झाला. याचदरम्यान अनेक प्रवाशांची उ•ाणे चुकली आणि विमान वाहतूक मोठ्या प्रमाणात प्रभावित झाली. सकाळी 8:25 च्या सुमारास सर्व्हर पूर्णपणे पूर्ववत केल्यानंतर वाहतूक सामान्य झाली. विमानतळावरील परिस्थिती कालांतराने सामान्य झाली असली तरी या घटनेमुळे एअरलाइन सिस्टमच्या विश्वासार्हता आणि तांत्रिक सुरक्षिततेवर गंभीर प्रश्न उपस्थित झाले आहेत.