टी-२० विश्वचषक २०२६ च्या सुपर-८ सामन्यात दक्षिण आफ्रिकेविरुद्ध भारतीय संघाच्या प्लेइंग इलेव्हनने सर्वांना आश्चर्याचा धक्का दिला. उपकर्णधार अक्षर पटेलला संघाबाहेर ठेवून वॉशिंग्टन सुंदरला संधी देण्यात आली; मात्र हा निर्णय भारतासाठी उलटाच ठरला. अहमदाबाद येथील नरेंद्र मोदी स्टेडियममध्ये भारताला तब्बल 76 धावांनी पराभव स्वीकारावा लागला.
सामन्यानंतर सहाय्यक प्रशिक्षक रायन टेन डोशेट यांनी या निवडीमागील कारण स्पष्ट केले. दक्षिण आफ्रिकेच्या वरच्या फळीमध्ये डावखुरे फलंदाज अधिक असल्यामुळे ऑफ-स्पिन गोलंदाजाला प्राधान्य देण्यात आले, असे त्यांनी सांगितले. क्विंटन डी कॉक, रायन रिकेल्टन आणि डेव्हिड मिलर हे तिघेही डावखुरे असल्याने पॉवरप्लेमध्ये सुंदर प्रभावी ठरू शकतो, असा संघ व्यवस्थापनाचा विश्वास होता.
आकडेवारी पाहता पॉवरप्लेमध्ये डावखुऱ्यांविरुद्ध सुंदरची कामगिरी अक्षरपेक्षा चांगली आहे. सुंदरने 57 डावांत 23 बळी घेतले आहेत, तर अक्षरने 62 डावांत 14 बळी मिळवले आहेत. मात्र मधल्या षटकांत अक्षरचा प्रभाव अधिक दिसून येतो. अक्षरने 79 डावांत 63 बळी घेतले असून सुंदरने 48 डावांत 23 बळी घेतले आहेत.
या सामन्यात भारताने दक्षिण आफ्रिकेचे 20 धावांत 3 फलंदाज बाद केले होते. मात्र त्यानंतर मिलर आणि डेवाल्ड ब्रेविस यांनी आक्रमक फलंदाजी करत डाव सावरला. मधल्या षटकांत भारतीय गोलंदाजांना बळी मिळाले नाहीत आणि सामन्याची सूत्रे हळूहळू दक्षिण आफ्रिकेकडे गेली.
सुंदरने मधल्या षटकांत फक्त दोन षटके टाकून 17 धावा दिल्या, पण त्याला यश मिळाले नाही. तज्ज्ञांच्या मते, जर अक्षर पटेल खेळला असता तर मधल्या षटकांत चार षटके टाकून धावगतीवर नियंत्रण ठेवता आले असते.
या पराभवानंतर संघ निवडीवर प्रश्नचिन्ह निर्माण झाले असून पुढील सामन्यांपूर्वी भारतीय संघ व्यवस्थापन मोठा निर्णय घेण्याची शक्यता आहे.
Comments are closed.