दक्षिण आफ्रिकेविरुद्ध कसोटी आणि वनडे मालिकेचे वेळापत्रक जाहीर! सप्टेंबर-ऑक्टोबरमध्ये रंगणार 6 सामने

दक्षिण आफ्रिकेच्या संघाने यंदाच्या टी-20 विश्वचषकात जबरदस्त कामगिरी केली आहे. लीग टप्प्यातील सर्व सामने जिंकून त्यांनी ‘सुपर 8’ मध्ये प्रवेश केला आणि पहिल्याच सामन्यात टीम इंडियाला नमवून सेमीफायनलच्या दिशेने पाऊल टाकले आहे. सध्या आफ्रिकन संघाचे लक्ष विश्वचषकावर असले, तरी आगामी सप्टेंबर-ऑक्टोबरमध्ये ऑस्ट्रेलियाचा संघ दक्षिण आफ्रिकेच्या दौऱ्यावर जाणार असून त्याचे वेळापत्रक जाहीर झाले आहे.

या दौऱ्यात 3 वनडे आणि 3 कसोटी सामने खेळवले जाणार आहेत. विशेष म्हणजे, 2017 मधील गाजलेल्या ‘सँडपेपर’ (बॉल टॅम्परिंग) प्रकरणानंतर ऑस्ट्रेलियन संघ पहिल्यांदाच दक्षिण आफ्रिकेच्या दौऱ्यावर जाणार आहे.

ही मालिका आगामी 2027 च्या वनडे विश्वचषकाच्या दृष्टीने दोन्ही संघांसाठी महत्त्वाची असेल.
पहिला वनडे: 24 सप्टेंबर
दुसरा वनडे: 27 सप्टेंबर
तिसरा वनडे: 30 सप्टेंबर

त्याचबरोबर कसोटी मालिका आयसीसी जागतिक कसोटी चॅम्पियनशिप (WTC) अंतर्गत खेळवली जाईल. दक्षिण आफ्रिकेने ऑस्ट्रेलियाला हरवूनच गेल्या वेळी ‘कसोटी चॅम्पियन’ होण्याचा मान मिळवला होता.

पहिली कसोटी: 9 ते 13 ऑक्टोबर
दुसरी कसोटी: 18 ते 22 ऑक्टोबर
तिसरी कसोटी: 27 ते 31 ऑक्टोबर

या मालिकेतील निकालावरच जागतिक कसोटी चॅम्पियनशिपच्या फायनलमध्ये कोण पोहोचणार, हे मोठ्या प्रमाणावर अवलंबून असेल. तसेच, दक्षिण आफ्रिका सध्या टी-20 विश्वचषकावर लक्ष केंद्रित करत आहे, जिथे एडन मारक्रमच्या (Aiden Markram) नेतृत्वाखाली संघ सेमीफायनल गाठण्यासाठी प्रयत्नशील आहे. 2024 च्या विश्वचषकात त्यांना भारताकडून फायनलमध्ये पराभव पत्करावा लागला होता, त्यामुळे यावेळी ते जेतेपद मिळवण्यासाठी उत्सुक आहेत.