क्रिकेटविश्वात शोककळा! क्रिकेटपटू रिंकू सिंगच्या वडिलांचे निधन, दीर्घ आजारानंतर नोएडामध्ये घेतला अखेरचा श्वास

टीम इंडियाचा स्टार क्रिकेटपटू रिंकू सिंगच्या वडिलांचे निधन झाले आहे. ते बऱ्याच काळापासून आजारी होते. त्यांनी ग्रेटर नोएडा येथील यथार्थ रुग्णालयात अखेरचा श्वास घेतला. रिंकू सिंगचे वडील खचंद्र सिंग हे स्टेज ४ लिव्हर कॅन्सरशी झुंजत होते. त्यांची प्रकृती अलिकडेच बरीच खालावली होती, त्यानंतर त्यांना रुग्णालयात दाखल करण्यात आले होते. वडिलांच्या बिघडत्या प्रकृतीची माहिती मिळताच रिंकू सिंग यांना अचानक टीम इंडिया सोडून घरी परतावे लागले.

रिंकू सिंगचे वडील खचंद्र सिंग गेल्या अनेक दिवसांपासून रुग्णालयात मेकॅनिकल व्हेंटिलेटर सपोर्टवर होते. त्यांना सतत रेनल रिप्लेसमेंट थेरपी मिळत होती. खचंद्र सिंग यांना स्टेज ४ लिव्हर कॅन्सरने दाखल केले होते. त्यांची प्रकृती गंभीर असल्याने त्यांच्यावर त्वरित उपचारांची आवश्यकता होती. यथार्थ हॉस्पिटलमधील डॉक्टरांची एक टीम त्यांच्यावर लक्ष ठेवून होती. रिंकू सिंग अलीकडेच नोएडा येथे त्यांच्या वडिलांना भेटण्यासाठी गेला होता.

मंगळवार, २४ फेब्रुवारी रोजी, चेन्नईतील एमए चिदंबरम स्टेडियमवर टीम इंडियाचा सराव सत्र आयोजित करण्यात आला होता. रिंकू सिंग सत्र वगळून नोएडाला त्याच्या वडिलांना भेटण्यासाठी गेला. इतर खेळाडू सराव करताना दिसले. त्यानंतरच त्याचे वडील गंभीर आजारी असल्याची आणि आयुष्याशी झुंज देत असल्याची बातमी आली. २८ वर्षीय रिंकू सिंग हा उत्तर प्रदेशातील अलीगढचा रहिवासी आहे.

रिंकू सिंग २०२६ च्या टी२० विश्वचषकातील सर्व गट टप्प्यातील सामन्यांमध्ये खेळला होता. तो सुपर ८ टप्प्यात दक्षिण आफ्रिकेविरुद्धच्या सामन्यातही सहभागी होता. तथापि, या विश्वचषकात तो फाॅर्ममध्ये नाही. तो खराब फॉर्मशी झुंजत होता. झिम्बाब्वेविरुद्धच्या सामन्यापूर्वी तो टीम इंडियामध्ये सामील झाला होता, परंतु त्याला त्या सामन्यात खेळण्याची संधी मिळाली नाही.