यंदाच्या टी-२० विश्वचषकातील सुपर-८ फेरीत झिम्बाब्वेविरुद्ध दमदार विजय नोंदवून टीम इंडियाने सेमीफायनलच्या दिशेने एक महत्त्वाचे पाऊल टाकले. भारताने ‘करा किंवा मरा’ हा सामना ७२ धावांनी जिंकला. चेन्नईच्या एमए चिदंबरम स्टेडियमवर झालेल्या या सामन्यात भारतीय फलंदाजांनी आक्रमक खेळ करत झिम्बाब्वेच्या गोलंदाजांना चिरडून टाकले.
प्रथम फलंदाजी करताना भारताने २० षटकांत ४ गडी गमावून २५६ धावा केल्या. डावाच्या शेवटच्या षटकात हार्दिक पांड्याने स्फोटक खेळी करून सामन्याला वेगळे वळण दिले. त्याने फक्त २३ चेंडूत नाबाद ५० धावा केल्या. या खेळीत ४ षटकार आणि २ चौकारांचा समावेश होता. त्याने तिलक वर्मा (नाबाद ४४) सोबत ३१ चेंडूत ८४ धावांची जलद भागीदारी केली. या भागीदारीने भारताला २५० षटकांचा टप्पा गाठण्यास मदत केली.
२५६ धावांच्या मोठ्या लक्ष्याचा पाठलाग करताना झिम्बाब्वेने काहीसा प्रतिकार केला. तथापि, भारतीय गोलंदाजांनी नियमित अंतराने विकेट्स घेत सामन्यावर नियंत्रण राखले. झिम्बाब्वेला मर्यादित २० षटकांत ६ विकेट्स गमावून फक्त १८४ धावा करता आल्या. अखेर भारताने ७२ धावांनी विजय मिळवला.
हार्दिक पंड्याच्या अष्टपैलू कामगिरीने या विजयात मोठी भूमिका बजावली. फलंदाजीने धमाकेदार अर्धशतक झळकावल्यानंतर, त्याने किफायतशीर गोलंदाजी देखील केली, ३ षटकांत फक्त २१ धावा दिल्या. सामन्यानंतर बोलताना पांड्या म्हणाला, “मी सुरुवातीला जोरदार फटकेबाजी करण्याचा प्रयत्न करत होतो. पण नंतर मी माझ्या वेळेत आत्मविश्वासाने खेळलो. लयीत येण्यासाठी हा सामना माझ्यासाठी महत्त्वाचा होता.”
दरम्यान, दक्षिण आफ्रिकेने वेस्ट इंडिजचा ९ विकेट्सने पराभव केला, हा निकाल भारतासाठीही महत्त्वाचा होता. पंड्याने कबूल केले की तो त्या सामन्यावर लक्ष ठेवून आहे. पण त्याने स्पष्ट केले की, “आमचे लक्ष आमचे सर्वोत्तम क्रिकेट खेळण्यावर आहे.” या विजयामुळे भारताचा आत्मविश्वास वाढला आहे आणि संघ आगामी सामन्यांसाठी सज्ज आहे.
Comments are closed.