T20WC2026: वेस्ट इंडिजविरुद्ध धडाकेबाज खेळी पाहून वैभव सूर्यवंशी झाला संजू सॅमसनचा चाहता; मागितली एक विशेष भेट

भारतीय संघाचा यष्टीरक्षक फलंदाज संजू सॅमसनने (Sanju Samson) वेस्ट इंडिजविरुद्ध 97 धावांची वादळी खेळी करत भारताचा सेमीफायनलमधील प्रवेश निश्चित केला. या खेळीनंतर सोशल मीडियावर संजूवर प्रेमाचा वर्षाव होत आहे. संजूचे सहकारी खेळाडूही त्याच्यासाठी पोस्ट करत आहेत, ज्यामध्ये 14 वर्षीय युवा खेळाडू वैभव सूर्यवंशीच्या (Vaibhav Suryavanshi) पोस्टने सर्वांचे लक्ष वेधून घेतले आहे. या पोस्टमुळे वैभवने संजूकडे केलेल्या एका जुन्या मागणीची पुन्हा आठवण झाली आहे.

वेस्ट इंडिजविरुद्ध संजू सॅमसनने केलेली धडाकेबाज खेळी क्रिकेट चाहते दीर्घकाळ लक्षात ठेवतील. या खेळीनंतर वैभव सूर्यवंशीने सोशल मीडियावर संजूचे कौतुक करताना लिहिले, ‘एक्स्ट्रा स्पेशल संजू भैया…’. आयपीएल 2025 दरम्यान हे दोन्ही खेळाडू राजस्थान रॉयल्सकडून एकत्र खेळले होते, तिथेच त्यांच्यात मोठ्या भावासारखे नाते निर्माण झाले आहे. जेव्हा संजू सॅमसनने राजस्थान रॉयल्सची साथ सोडली होती, तेव्हा वैभवने त्याच्यासाठी एक प्रेमळ पोस्ट लिहिली होती. त्यात त्याने म्हटले होते की, तुम्ही आता आयपीएल 2026 मध्ये चेन्नई सुपर किंग्सकडून खेळलात तरी चालेल… पण मला तुमची बॅट गिफ्ट म्हणून द्यावी लागेल. वैभव नेहमीच दिग्गज खेळाडूंकडे बॅटची मागणी करताना दिसतो.

वैभव सूर्यवंशी सध्या डीवाय पाटील टी-20 लीगमध्ये खेळत आहे. त्याआधी तो आयपीएल 2026 साठी राजस्थान रॉयल्सच्या सराव शिबिराचा भाग होता. वैभवला या हंगामातही आपल्या बॅटने धमाका करून भारतीय संघात स्थान मिळवायचे आहे. दुसरीकडे, संजू सॅमसन आता 5 मार्च रोजी इंग्लंडविरुद्धच्या सेमीफायनलमध्ये खेळताना दिसेल. तिथेही तो आपला हाच फॉर्म कायम ठेवण्याचा प्रयत्न करेल. भारतीय संघासाठी हा सामना अत्यंत महत्त्वाचा असणार आहे.