टी-20 वर्ल्डकपनंतर पाकिस्तान क्रिकेटमध्ये खळबळ; बाबर-शादाबला विरोध करणारा सेलेक्टर निवड समितीतू

पाकिस्तान क्रिकेट बातम्या : टी-20 विश्वचषक 2026 च्या सुपर-8 फेरीतून पाकिस्तानचा संघ बाहेर झाल्यानंतर काहीच दिवसांत राष्ट्रीय निवड समितीत मोठा भूकंप झाला आहे. निवड समितीचे सदस्य आणि माजी आंतरराष्ट्रीय पंच अलीम डार यांनी आपल्या पदाचा राजीनामा दिला आहे. प्रशिक्षक माइक हेसन यांचे वाढते अधिकार आणि सहकारी सदस्य आकिब जावेद यांची मौनवृत्ती यामुळे ते नाराज होते, अशी माहिती समोर आली आहे. सुपर-8 फेरीत न्यूजीलंडविरुद्धचा एक सामना पावसामुळे रद्द झाला, तर दुसऱ्या सामन्यात इंग्लंडकडून पराभव पत्करावा लागला. त्यामुळे पाकिस्तानच्या उपांत्य फेरीच्या आशा पूर्णपणे धुळीस मिळाल्या.

T-20 विश्वचषक संघनिवारण वाद…

‘जिओ न्यूज’च्या वृत्तानुसार, अलीम डार यांना महत्त्वाच्या संघनिवडीच्या चर्चांमध्ये वारंवार डावलले जात असल्याची भावना होती. त्यांनी टी-20 विश्वचषकासाठी बाबर आझम, शादाब खान आणि उस्मान खान यांचा संघात समावेश करण्यास तीव्र विरोध दर्शवला होता, असेही या अहवालात नमूद करण्यात आले आहे.

बाबर आझमचा विश्वचषकातील फॉर्म समाधानकारक नव्हता. त्याने चार डावांत केवळ 91 धावा केल्या, आणि त्याचा स्ट्राइक रेट रन-ए-बॉलपेक्षा थोडाच जास्त होता. श्रीलंकेविरुद्धच्या सामन्यात त्याला अंतिम अकरातूनही वगळण्यात आले होते. दुसरीकडे शादाब खानने183 धावा केल्या, मात्र केवळ पाच बळी घेतले.

मोहम्मद रिजवानसाठी ठाम भूमिका

डार यांनी मधल्या फळीतील (क्रमांक ६) महत्त्वाच्या भूमिकेसाठी यष्टीरक्षक-फलंदाज मोहम्मद रिजवान यांना पाठिंबा दिला होता. खराब कामगिरी करणाऱ्या खेळाडूंना जर संधी दिली जात असेल, तर रिजवानलाही मधल्या फळीत निश्चित भूमिका मिळायला हवी, असा त्यांचा युक्तिवाद होता.

निवड समितीतील अंतर्गत मतभेद उघड

या घडामोडींमुळे निवड समितीतील वाढते अंतर्गत मतभेद स्पष्ट झाले आहेत. आकिब जावेद अनेकदा प्रशिक्षक माइक हेसन यांच्या मतांशी सहमत असल्याचे दिसून आले, तर माजी कर्णधार मिस्बाह-उल-हक महत्त्वाच्या चर्चांदरम्यान प्रामुख्याने शांत राहिल्याचे सांगितले जाते. ठोस आणि सशक्त चर्चेचा अभाव असल्याने डार यांना आपण एकटे पडल्याची भावना निर्माण झाली होती.

17 महिन्यांचा कार्यकाळ संपुष्टात

या राजीनाम्यामुळे अलीम डार यांचा निवडकर्ता म्हणून 17 महिन्यांचा कार्यकाळ संपुष्टात आला. त्यांची नियुक्ती 11 ऑक्टोबर 2024 रोजी नव्या निवड पॅनेलमध्ये करण्यात आली होती. या पॅनेलमध्ये आकिब जावेद, माजी कसोटी कर्णधार अजहर अली आणि विश्लेषक हसन चीमा यांचा समावेश होता. पाकिस्तान क्रिकेटमधील ही ताजी घडामोड आगामी काळात आणखी मोठे बदल घडवून आणते का, याकडे आता सर्वांचे लक्ष लागले आहे.

हे ही वाचा –

IND vs ENG T20 World Cup Semi Final : वानखेडेची खेळपट्टी पाहताच गौतम गंभीर संतापला; पिच क्यूरेटरसोबत वाद?, इंग्लंडविरुद्धच्या सेमीफायनलआधी काय घडलं?

आणखी वाचा