IND vs ENG T20 विश्वचषक उपांत्य फेरी: इंग्लंडचा कर्णधार हॅरी ब्रूक टी-20 विश्वचषकात सलग पाच विजय मिळवल्यानंतर प्रचंड आत्मविश्वासात आहे. भारताविरुद्धच्या हायव्होल्टेज उपांत्य फेरीच्या एक दिवस आधी त्याने सूचक शब्दांत स्पष्ट केले. “आम्ही कधीच खेळातून बाहेर नसतो. दबाव टोकाला पोहोचला की आमचा खेळ अधिक उंचावतो.”
इंग्लंडने गट टप्प्यात नेपाळ, स्कॉटलंड आणि इटली यांच्यावर दणदणीत विजय मिळवत पुढची फेरी गाठली. मात्र वेस्ट इंडिजविरुद्ध त्यांना मोठा पराभव पत्करावा लागला. तरीही सुपर-8 फेरीत ब्रूकच्या नेतृत्वाखाली इंग्लंडने श्रीलंका, पाकिस्तान आणि न्यूझीलंड यांच्याविरुद्ध अपराजित राहून उपांत्य फेरीत दमदार प्रवेश केला.
“हीच चांगल्या संघाची ओळख….”
स्काय स्पोर्ट्स क्रिकेटशी बोलताना ब्रूक म्हणाला, “आम्ही सामने जिंकतो आहोत, ही चांगल्या संघाची खूण आहे. मी एक गोष्ट शिकलो आहे, सामना संपेपर्यंत आपण कधीच बाहेर नसतो. माझ्याकडे प्रचंड कॅरेक्टर असलेले खेळाडू आहेत. ते जिंकण्याची तीव्र इच्छा बाळगतात आणि दबावातही शांत राहतात.” त्याच्या मते, याच आत्मविश्वासामुळे इंग्लंड यजमान भारताविरुद्धच्या सेमीफायनलमध्ये अधिक मजबूत ठरतो. इंग्लंडच्या आक्रमक विचारसरणीवर भर देताना तो म्हणाला, “मी नेहमी फलंदाजांसाठी शक्य तितकं कठीण वातावरण निर्माण करू इच्छितो.”
टॉप ऑर्डरला ठाम पाठिंबा…
व्हाईट-बॉल क्रिकेटमधील दिग्गज जोस बटलर याचा अपेक्षित फॉर्म नसतानाही आणि फिल सॉल्ट सातत्य राखू न शकल्यानेही ब्रूकने आपल्या टॉप ऑर्डरला पूर्ण पाठिंबा दिला आहे. तो म्हणाला, “जोसला एकटं सोडायला हवं. तो या खेळातील सर्वोत्तम खेळाडूंमध्ये गणला जातो. मला खात्री आहे, तो मोठी खेळी करेल. आमच्या टॉप-7 मध्ये इतके दमदार खेळाडू आहेत की एखादा अपयशी ठरला तरी विरोधी संघ गोंधळून जाईल.”
विल जॅक्सचे कौतुक, सेमीफायनलवर नजर…
ऑलराउंडर विल जॅक्स याचंही ब्रूकने विशेष कौतुक केलं. “त्याचा हा पहिलाच मोठा विश्वचषक आहे, पण त्याने आपली भूमिका उत्तम प्रकारे पार पाडली. त्याने दाखवलेला कॅरेक्टर अप्रतिम आहे,” असे तो म्हणाला. उपांत्य फेरीबाबत ब्रूकने शेवटी स्पष्ट केले, “हा सामना जबरदस्त होणार आहे. दोन्ही संघांसाठी प्रचंड दबावाचा आणि मोठ्या संधीचा क्षण आहे.” आता भारताविरुद्ध इंग्लंडचा आत्मविश्वास खऱ्या अर्थाने कसोटीला लागणार आहे.
हे ही वाचा –
आणखी वाचा
Comments are closed.