शतक थोडक्यात हुकलं, पण संजू सॅमसनची तुफानी खेळी; इंग्लंडला अक्षरक्ष: बडवले

आयसीसी टी20 वर्ल्ड कप 2026 च्या उपांत्य फेरीत भारतीय संघाचा स्टार विकेटकीपर-फलंदाज संजू सॅमसनने इंग्लंडविरुद्ध धडाकेबाज फलंदाजी करत चाहत्यांना अक्षरशः मंत्रमुग्ध केले. मुंबईतील वानखेडे स्टेडियमवर खेळल्या गेलेल्या या सामन्यात सॅमसनने अवघ्या 42 चेंडूत 89 धावांची तुफानी खेळी साकारली. शतकाच्या अगदी जवळ येऊनही तो तीन अंकी धावसंख्येला मुकला, मात्र त्याच्या या आक्रमक खेळीमुळे भारताने मजबूत धावसंख्या उभारण्याची भक्कम पायाभरणी केली.

संजू सॅमसनच्या या शानदार खेळीत 7 षटकार आणि 8 चौकारांचा समावेश होता. त्याने अवघ्या 26 चेंडूत अर्धशतक पूर्ण करत इंग्लिश गोलंदाजांवर दबाव निर्माण केला. विशेष म्हणजे या सामन्यापूर्वी वेस्ट इंडिजविरुद्धच्या लढतीतही सॅमसनने 97 धावांची ऐतिहासिक खेळी करत भारताला विजय मिळवून दिला होता. त्यामुळे सलग दुसऱ्या सामन्यात त्याने दमदार कामगिरी करत आपली फॉर्म कायम असल्याचे सिद्ध केले.

दरम्यान, सॅमसनला या खेळीत एक मोठे जीवनदानही मिळाले. तो 15 धावांवर असताना इंग्लंडचा कर्णधार हॅरी ब्रूकने त्याचा सोपा झेल सोडला. या संधीचा पुरेपूर फायदा घेत सॅमसनने नंतर आक्रमक फलंदाजी करत इंग्लंडच्या गोलंदाजांची धुलाई केली. त्याच्या फलंदाजीमुळे वानखेडे स्टेडियमवर उपस्थित प्रेक्षकांमध्ये प्रचंड उत्साह पाहायला मिळाला.

या सामन्यात इंग्लंडचा कर्णधार हॅरी ब्रूक याने नाणेफेक जिंकून प्रथम गोलंदाजी करण्याचा निर्णय घेतला आणि भारताला फलंदाजीसाठी आमंत्रित केले. मात्र भारताची सुरुवात अपेक्षेप्रमाणे झाली नाही. सलामीवीर अभिषेक शर्मा केवळ 9 धावा करून बाद झाला. त्यानंतर सॅमसनने ईशान किशनसोबत डाव सावरत संघाची धावगती कायम ठेवली.

ईशान किशननेही उपयुक्त फलंदाजी करत 18 चेंडूत 39 धावा केल्या. त्याच्या या खेळीत 4 चौकार आणि 2 षटकारांचा समावेश होता. मात्र त्याच्या बाद झाल्यानंतरही सॅमसनने आक्रमक खेळी सुरू ठेवत भारताला भक्कम स्थितीत पोहोचवले.

टी20 वर्ल्ड कपच्या इतिहासात भारत आणि इंग्लंड यांच्यातील ही उपांत्य फेरीतील तिसरी लढत ठरली आहे. यापूर्वी 2022 मध्ये इंग्लंडने भारताचा पराभव केला होता, तर 2024 मध्ये भारताने त्या पराभवाचा बदला घेतला होता. त्यामुळे या निर्णायक सामन्यात कोणता संघ बाजी मारतो, याकडे संपूर्ण क्रिकेटविश्वाचे लक्ष लागले आहे.