हिंदुस्थानच्या क्रिकेट विश्वात पुन्हा एकदा धडाकेबाज रणशिंग फुंकले गेले आहे. बीसीसीआयने 2026-27 या आंतरराष्ट्रीय देशांतर्गत मालिकांचे वेळापत्रक जाहीर करताच क्रिकेटप्रेमींचा उत्साह अक्षरशः उफाळून आला आहे. यंदाचा हंगाम केवळ सामने नाहीत, तर क्रिकेटचा महोत्सव ठरणार आहे. कारण मैदानावर पुन्हा रंगणार आहे ‘हिटमॅन’ रोहित शर्मा आणि ‘किंग’ विराट कोहली यांचा थरारक जलवा. पाच महिन्यांत हिंदुस्थानी क्रिकेटप्रेमींना आपल्या घरच्या मैदानांवर 22 आंतरराष्ट्रीय सामन्यांची मेजवानी चाखायला मिळणार आहे.
'हिटमॅन'-'राजा'चा धमाका; वनडेत चाहत्यांची मेजवानी!
सध्या कसोटी आणि टी-20पासून दूर असलेले रोहित शर्मा आणि विराट कोहली हे दोघेही वन डे क्रिकेटवर लक्ष पेंद्रित करत आहेत. त्यामुळे वेस्ट इंडीज, श्रीलंका आणि झिम्बाब्वेविरुद्ध होणाऱ्या एकदिवसीय मालिकांमध्ये या दिग्गजांची फलंदाजी पाहण्यासाठी चाहत्यांची प्रचंड गर्दी उसळणार हे निश्चित. चौकार-षटकारांचा पाऊस आणि स्टेडियममधील जल्लोष हा हंगाम म्हणजे क्रिकेटप्रेमींसाठी पर्वणीच ठरणार आहे.
वेस्ट इंडीजपासून मालिकांची सुरुवात
सप्टेंबर 2026 पासून वेस्ट इंडीजविरुद्ध मालिकेने हिंदुस्थानची मोहीम सुरू होणार आहे. त्यानंतर श्रीलंका, झिम्बाब्वे आणि अखेर ऑस्ट्रेलियाविरुद्धची बॉर्डर-गावसकर कसोटी मालिका-अशी तुफानी मालिकांची रेलचेल रंगणार आहे.
17 शहरांत क्रिकेटचा जल्लोष
या देशांतर्गत मालिकांमध्ये तब्बल 17 शहरांमध्ये 22 आंतरराष्ट्रीय सामने रंगणार आहेत. गुवाहाटीपासून अहमदाबादपर्यंत प्रत्येक मैदानावर क्रिकेटचा ज्वालामुखी उसळणार आहे. 5 कसोटी, 9 वन डे आणि 8 टी-20 सामने, असा तुफानी कार्यक्रम चाहत्यांसाठी सज्ज आहे.
सीमा–गावसकर ट्रॉफीचा खरा कसोटी संग्राम
या हंगामाचा कळस म्हणजे ऑस्ट्रेलियाविरुद्धची बॉर्डर-गावसकर ट्रॉफी. नागपूर, चेन्नई, गुवाहाटी, रांची आणि अहमदाबाद येथे रंगणाऱ्या कसोटींमध्ये हिंदुस्थानची खरी परीक्षा होणार आहे. प्रत्येक चेंडू, प्रत्येक सत्र आणि प्रत्येक धाव इतिहास लिहिणारी ठरणार आहे.
गिलच्या नेतृत्वाखाली नवी झेप
या सर्व मालिकांमध्ये हिंदुस्थानची धुरा शुभमन गिल सांभाळणार असून 2027 च्या वन डे वर्ल्ड कप आणि जागतिक कसोटी अजिंक्यपदासाठी ही मोठी तयारी असणार आहे. ‘हिटमॅन’-‘किंग’चा अनुभव आणि नव्या पिढीची ऊर्जा या संगमातून हिंदुस्थान क्रिकेटमध्ये नवे वर्चस्व निर्माण करणार, यात शंका नाही.
Comments are closed.