विराट कोहली नाही, 22 वर्षांचा 'हा' युवा खेळाडू ठरणार आरसीबीचा गेमचेंजर; आर. अश्विनचा मोठा दावा!

भारतीय संघाचा माजी फिरकी अष्टपैलू खेळाडू रविचंद्रन अश्विनने इंडियन प्रीमियर लीगच्या १९ व्या हंगामापूर्वी एक मोठी भविष्यवाणी केली आहे. शनिवारी २८ मार्च रोजी होणाऱ्या आयपीएल २०२६ च्या पहिल्याच सामन्यात, सनरायझर्स हैदराबादविरुद्ध आरसीबीसाठी २२ वर्षांचा इंग्लिश स्टार जॅकब बेथेल हा ‘पावर प्लेयर’ ठरेल, असा दावा अश्विनने केला आहे. बेथेलने याच महिन्याच्या सुरुवातीला टी-२० वर्ल्ड कपच्या उपांत्य फेरीत भारताविरुद्ध १०५ धावांची झंझावाती खेळी केली होती, ज्यामुळे यजमान भारतीय संघाला आपले जेतेपद राखण्यापासून जवळजवळ रोखलेच होते.

​आता आरसीबी बेथेलला कोणत्या क्रमांकावर फलंदाजीला पाठवते हे पाहणे महत्त्वाचे ठरेल, कारण आयपीएल २०२५ मध्ये फिल सॉल्टच्या अनुपस्थितीमुळेच त्याला गेल्या दोन सामन्यांत खेळण्याची संधी मिळाली होती. दरम्यान, अश्विनने असाही अंदाज वर्तवला आहे की, हैदराबादच्या ताफ्यातून सर्वांच्या नजरा हेनरिक क्लासेनवर खिळलेल्या असतील.

​आपल्या यूट्यूब चॅनेलवर बोलताना अश्विन म्हणाला, “या सामन्याबद्दल मला एक वेगळीच भावना (फीलिंग) येत आहे. गेल्या १८ महिन्यांत या खेळाडूने फारसे काही विशेष केलेले नाही. तरीही मला असे वाटतेय की, हेनरिक क्लासेनसाठी आजची रात्र संस्मरणीय ठरणार आहे, नक्की का ते माहित नाही. पण आरसीबीच्या बाजूने विचार केला तर मला वाटते की जॅकब बेथेल आजचा ‘पावर प्लेयर’ असेल.”

​सनरायझर्स हैदराबादच्या मजबूत फलंदाजीच्या फळीत महत्त्वाची भूमिका बजावण्यासाठी क्लासेन पूर्णपणे सज्ज आहे. आयपीएल २०२५ मध्ये सुरुवातीला त्याला लोअर मिडल ऑर्डरमध्ये खेळवण्यात आले होते, परंतु हंगाम जसा पुढे गेला तशी त्याची फलंदाजीच्या क्रमवारीत बढती झाली. आपल्या शेवटच्या सामन्यात तिसऱ्या क्रमांकावर फलंदाजी करताना क्लासेनने कोलकाता नाईट रायडर्सविरुद्ध अवघ्या ३९ चेंडूत नाबाद १०५ धावा ठोकल्या होत्या.

​हेनरिक क्लासेन, जो २०१९ मध्ये बंगळुरूच्या फ्रँचायझीकडून खेळला होता, त्यानंतर त्याने आरसीबीविरुद्ध अनेकदा शानदार कामगिरी केली आहे. सध्याच्या चॅम्पियन संघाविरुद्ध (RCB) खेळलेल्या ५ सामन्यांत त्याने ४६.८ च्या सरासरीने आणि १९६.६४ च्या स्ट्राईक रेटने एकूण २३४ धावा केल्या आहेत.

​क्लासेनच्या उत्कृष्ट खेळींमध्ये आयपीएल २०२३ मध्ये हैदराबादमध्ये झळकावलेल्या एका शानदार शतकाचा समावेश आहे, ज्यात त्याने सनरायझर्स हैदराबादच्या एकूण धावसंख्येतील अर्ध्याहून अधिक वाटा एकट्याने उचलला होता. तसेच २०२४ मध्ये एम. चिन्नास्वामी स्टेडियमवर त्याने फक्त ३१ चेंडूत धडाकेबाज ६७ धावा केल्या होत्या, ज्यामुळे SRH ला आरसीबीविरुद्ध २८७ धावांचा ऐतिहासिक विक्रम प्रस्थापित करण्यात मदत झाली होती.