IPL 2026: धोनीचे पुनरागमन लांबणीवर; नेमके किती सामने खेळणार नाही? पहिल्या सामन्यासाठी गुवाहाटीला न जाण्याचे कारण समोर

आयपीएल 2026 (IPL 2026) च्या (Indian premiere league 2026) 19 व्या हंगामाला 28 मार्चपासून सुरुवात झाली आहे. पाच वेळा विजेतेपद मिळवणारा चेन्नई सुपर किंग्स (CSK) संघ आपला पहिला सामना 30 मार्च रोजी गुवाहाटी येथे खेळणार आहे. मात्र, या सामन्यात सीएसकेचा (CSK) सर्वात मोठा खेळाडू आणि माजी कर्णधार एमएस धोनी (MS Dhoni) मैदानात दिसणार नाही.

44 वर्षीय धोनी सध्या पिंडलीच्या (Calf Injury) दुखापतीशी झुंज देत आहे. सुरुवातीला तो फक्त 2 आठवडे बाहेर असेल असे वाटले होते, परंतु ताज्या माहितीनुसार तो एप्रिलच्या शेवटच्या आठवड्यापर्यंत फिट होण्याची शक्यता कमी आहे. याचाच अर्थ, धोनी आता 4 ऐवजी किमान 6 सामन्यांना मुकण्याची शक्यता आहे. सीएसकेच्या अधिकाऱ्यांनी याला संघासाठी एक ‘मोठा धक्का’ म्हटले आहे.

चेन्नईचा संघ पहिल्या सामन्यासाठी गुवाहाटीला पोहोचला आहे, पण धोनी त्यांच्यासोबत गेलेला नाही. तो सध्या चेन्नईतच राहून दुखापतीतून सावरण्यासाठी ‘रिहॅबिलिटेशन’ (आराम आणि उपचार) घेत आहे, जेणेकरून तो लवकर मैदानात परतू शकेल.

धोनीच्या अनुपस्थितीत या हंगामात चेन्नईसाठी यष्टीरक्षणाची (Wicketkeeping) जबाबदारी संजू सॅमसन (Sanju Samson) सांभाळताना दिसेल. चेन्नईने राजस्थान रॉयल्सकडून 18 कोटी रुपयांच्या ट्रेडद्वारे संजूला आपल्या संघात सामील करून घेतले आहे.