IPL 2026: क्रिकेट चाहत्यांसाठी वाईट बातमी! 'या' देशात आयपीएल 2026 स्पर्धेच्या प्रक्षेपणावर बंदी

आयपीएल 2026 स्पर्धेचा (Indian premiere league 2026) उत्साह जगभरात असतानाच, बांगलादेशमधील क्रिकेट चाहत्यांसाठी एक मोठी निराशाजनक बातमी समोर आली आहे. या हंगामात ते त्यांच्या आवडत्या स्पर्धेचे थेट प्रक्षेपण टीव्हीवर पाहू शकणार नाहीत. भारताची मीडिया कंपनी ‘जिओस्टार’ (JioStar) ने बांगलादेशमधील आपला IPL ब्रॉडकास्ट करार संपवला आहे. यासोबतच हे स्पष्ट झाले आहे की, यावर्षी इंडियन प्रीमियर लीग म्हणजेच IPL चे थेट प्रक्षेपण बांगलादेशमध्ये होणार नाही, मग तिथल्या सरकारने आपल्या भूमिकेत थोडी नरमी दाखवली असली तरीही.

खरे तर, यापूर्वीच्या सरकारने आयपीएलच्या प्रक्षेपणावर बंदी घातली होती. याचे मुख्य कारण मुस्तफिजुर रहमानशी संबंधित वाद होता, ज्याला बीसीसीआयने लीगधून बाहेर करण्याचा निर्णय घेतला होता. या निर्णयाच्या निषेधार्थ बांगलादेशने कठोर भूमिका घेतली होती आणि इतकेच नाही तर आयसीसीकडे आपला टी20 वर्ल्ड कप सामना भारताबाहेर खेळवण्याची मागणीही केली होती. मात्र, अलीकडेच बांगलादेशच्या अधिकाऱ्यांनी या बंदीवर पुनर्विचार करण्याचे संकेत दिले होते, पण मीडिया रिपोर्ट्सनुसार, जिओस्टारच्या या निर्णयानंतर आता IPL टीव्हीवर परतण्याची कोणतीही शक्यता उरलेली नाही.

बांगलादेशमध्ये यापूर्वी ‘टी स्पोर्ट्स’ (TSports) आयपीएल सामन्यांचे प्रक्षेपण करत असे. त्यांनी 2023 ते 2027 च्या हंगामासाठी सब-लाइसेंस घेतले होते. परंतु, कंपनीने आपल्या पार्टनरकडून पेमेंटच्या मुदतीचे पालन न करणे, हे या निर्णयाचे मोठे कारण असल्याचे सांगितले आहे. इतकेच नाही तर हा निर्णय फक्त IPL पुरता मर्यादित नाही. रिपोर्ट्सनुसार, जिओस्टारने ‘वूमेन्स प्रीमियर लीग’ (WPL) च्या प्रक्षेपण करारातूनही स्वतःला वेगळे केले आहे. या हंगामात आयपीएलमध्ये बांगलादेशचा एकमेव खेळाडू मुस्तफिजुर रहमान होता, ज्याला कोलकाता नाईट रायडर्सने आपल्या संघात सामील केले होते. पण भारत आणि बांगलादेशमधील वाढत्या राजनैतिक तणावामुळे बीसीसीआयने फ्रँचायझीला त्याला रिलीज करण्याचे (संघातून मुक्त करण्याचे) निर्देश दिले.

बांगलादेशमध्ये थेट प्रक्षेपण न झाल्यामुळे IPL च्या व्ह्यूअरशिपवर (प्रेक्षकसंख्या) मोठा परिणाम होऊ शकतो. दुसरीकडे, यावर्षी भारताचा बांगलादेश दौरा देखील अनिश्चिततेच्या भोवऱ्यात दिसत आहे, ज्यामुळे दोन्ही देशांतील क्रिकेट संबंधांवरही प्रश्नचिन्ह निर्माण झाले आहे.