आयपीएलमध्ये मुंबई इंडियन्सचा 'एक्स फॅक्टर' खेळाडू कोण? मुख्य प्रशिक्षकांकडून अफगाण खेळाडूच्या नावावर शिक्कामोर्तब

५ वेळा इंडियन प्रीमियर लीगचे जेतेपद पटकावणाऱ्या मुंबई इंडियन्स संघाने १९ व्या हंगामाची सुरुवात विजयाने केली आहे. मुंबई इंडियन्सने आपल्या घरच्या मैदानावर कोलकाता नाईट रायडर्सविरुद्ध खेळलेला पहिला सामना ६ गडी राखून जिंकला. आता या हंगामातील आपला दुसरा सामना त्यांना ४ एप्रिल रोजी दिल्ली कॅपिटल्सविरुद्ध दिल्लीच्या अरुण जेटली स्टेडियमवर खेळायचा आहे. या सामन्यातही विजयाची लय कायम राखण्याकडे त्यांचे लक्ष असेल, पण हे काम त्यांच्यासाठी अजिबात सोपे नसेल कारण दिल्ली कॅपिटल्सनेही विजयानेच हंगामाची सुरुवात केली आहे. या महत्त्वाच्या सामन्यापूर्वी मुंबई इंडियन्सचे मुख्य प्रशिक्षक महेला जयवर्धने यांचे मोठे विधान समोर आले आहे, ज्यामध्ये त्यांनी आपल्या संघाच्या ‘एक्स फॅक्टर’ खेळाडूचा उल्लेख केला आहे, जो अफगाणिस्तानचा २० वर्षांचा अल्लाह गझानफर आहे.

​आयपीएलच्या १९ व्या हंगामात २० वर्षांच्या अफगाण फिरकीपटू अल्लाह गझानफरची सुरुवात फारशी चांगली झालेली नाही, केकेआरविरुद्धच्या सामन्यात त्याने ५१ धावा दिल्या होत्या. असे असूनही, दिल्ली कॅपिटल्सविरुद्धच्या सामन्यापूर्वी झालेल्या पत्रकार परिषदेत मुंबई इंडियन्सचे मुख्य प्रशिक्षक महेला जयवर्धने यांनी त्याचा बचाव केला आणि सांगितले की, तो भविष्यातील खेळाडू आहे. त्याची उंची आणि क्षमता इतकी चांगली आहे की तो कमाल करू शकतो. मला पूर्ण खात्री आहे की तो आगामी सामन्यांमध्ये चांगली कामगिरी करेल. त्यासाठी त्याला अनुभवाची गरज आहे. त्याला श्रीलंकेविरुद्ध खेळायचे होते पण ती मालिका रद्द झाली. पहिल्या सामन्यातील त्याच्या कामगिरीबद्दल मी फार काळजीत नाही, त्याने चांगली गोलंदाजी केली होती फक्त ४-५ खराब चेंडूंमुळे त्याला फटका बसला. तो आमच्यासाठी एक ‘एक्स फॅक्टर’ गोलंदाज आहे.

​मुंबई इंडियन्सने शेवटच्या वेळी २०२० मध्ये आयपीएलची ट्रॉफी जिंकली होती, त्यानंतर त्यांना अद्याप जेतेपद मिळवता आलेले नाही. याबद्दल बोलताना महेला जयवर्धने म्हणाले की, स्पर्धेत १० संघ असल्यामुळे स्पर्धा खूप कठीण झाली आहे. असे असूनही, गेल्या ५ वर्षांत आम्ही दोन किंवा तीन वेळा प्ले-ऑफपर्यंत पोहोचण्यात यशस्वी झालो आहोत. आम्हाला माहित आहे की एक संघ म्हणून आम्ही सातत्याने चांगली कामगिरी करत आहोत.