संजू सॅमसनचा लकी चार्म कोण? शतक ठोकल्यानंतर फलंदाजाचा खुलासा, म्हणाला – “प्रत्येक सामन्यात…”

चालू आयपीएल हंगामात आतापर्यंत 18 सामने खेळले गेले आहेत. या हंगामातील पहिले शतक 18व्या सामन्यात झाले. हा पराक्रम सीएसकेचा सलामीवीर संजू सॅमसनने केला. दिल्ली कॅपिटल्सविरुद्धच्या सामन्यात संजू सॅमसनने शानदार फलंदाजी करत 52 चेंडूंमध्ये आपले शतक पूर्ण केले. शतक झळकावल्यानंतर संजू खूप आनंदी दिसत होता, कारण या सामन्यापूर्वी तो धावा करत नव्हता आणि चेन्नई संघही सतत सामने हरत होता. अशा परिस्थितीत चेन्नईच्या पुनरागमनासाठी संजूला फॉर्ममध्ये येणे खूप महत्त्वाचे होते.

दिल्ली कॅपिटल्सविरुद्ध शतक झळकावल्यानंतर संजू सॅमसनने एक मजेशीर विधान केले. डावाच्या मध्यंतरात संजूने प्रसारकांशी संवाद साधला. त्याने भारताचे माजी प्रशिक्षक रवी शास्त्री यांना आपला लकी चार्म म्हटले आणि गंमतीने म्हणाला, “खूप छान वाटतंय. धन्यवाद, रवी शास्त्री, तुम्ही माझे लकी व्यक्ती आहात. कृपया प्रत्येक सामन्याला या, सर.” आपल्या फॉर्मबद्दल बोलताना संजू म्हणाला, “खरं सांगायचं तर, तुमचा फॉर्म कितीही चांगला असला तरी, देशासाठी सामने जिंकल्यानंतर आलेले काही अपयश शंका निर्माण करू शकतात. मला मूलभूत गोष्टींवर लक्ष केंद्रित करायचे होते. मी अधिक आक्रमकपणे खेळावे की नाही, असा मला प्रश्न पडला, पण मी माझ्या मूलभूत गोष्टींवरच ठाम राहिलो आणि सुदैवाने आज मला यश मिळाले.”

खेळपट्टीबद्दल बोलताना संजू म्हणाला, “सुरुवातीला चेंडू बॅटवर येत होता. जेव्हा अक्षर पटेलने पॉवरप्लेमध्ये गोलंदाजी केली, तेव्हा चेंडू थांबत होता. पण जसजसा खेळ पुढे सरकला, तसतशी खेळपट्टी फलंदाजीसाठी चांगली झाली. आयुष म्हात्रेसोबत फलंदाजी करणे हा एक उत्तम अनुभव होता. आम्हा दोघांनाही मिळून शक्य तितकी मोठी धावसंख्या उभारायची होती. आमची फलंदाजीची फळी मोठी आहे, त्यामुळे आम्ही योग्य गोलंदाजांची निवड करून त्यांना लक्ष्य करत होतो. आम्ही एक मोठी धावसंख्या उभारू शकलो याचा मला आनंद आहे.

दिल्लीविरुद्धच्या सामन्याच्या सुरुवातीपासूनच संजू सॅमसन चांगल्या फॉर्ममध्ये दिसत होता. त्याने आपल्या खेळीत 15 चौकार आणि चार उत्तुंग षटकार ठोकले. या दरम्यान त्याचा स्ट्राईक रेट 205.36 होता. हे संजूच्या आयपीएल कारकिर्दीतील चौथे शतक आहे. या सामन्यात संजूने 52 चेंडूंमध्ये शतक पूर्ण केले. हे त्याच्या आयपीएल कारकिर्दीतील सर्वात वेगवान शतक आहे. सॅमसनने यापूर्वी सनरायझर्स हैदराबाद, पंजाब किंग्स आणि रायझिंग पुणे सुपरजायंट्सविरुद्ध शतके झळकावली आहेत. आता संजू आगामी सामन्यांमध्येही मोठी खेळी खेळण्यास उत्सुक असेल.