इराणमधून आणखी 312 भारतीय परत आले

धोकादायक परिस्थितीतून आर्मेनियामार्गे 312 मच्छिमारांना बाहेर काढण्यात यश

वृत्तसंस्था/ नवी दिल्ली

मध्यपूर्वेतील युद्धाचा वाढता धोका लक्षात घेता परराष्ट्र मंत्रालयाने इराणमध्ये अडकलेल्या भारतीयांना बाहेर काढण्याची प्रक्रिया अधिक तीव्र केली आहे. 312 भारतीय मच्छिमारांना आर्मेनियामार्गे यशस्वीरित्या भारतात परत आणण्यात आल्याचे परराष्ट्रमंत्री एस. जयशंकर यांनी सांगितले. जयशंकर यांनी या गुंतागुंतीच्या मोहिमेतील सहकार्याबद्दल आर्मेनिया सरकार आणि त्यांचे समकक्ष, अरारत मिर्झोयान यांचे विशेष आभार मानले. इराणमधील सुरक्षा परिस्थिती आणि इंटरनेट सेवांवर गंभीर परिणाम झाला असतानाच ही कारवाई पूर्ण झाली आहे.

मध्यपूर्वेतील सध्याच्या तणावाच्या पार्श्वभूमीवर पाकिस्तानची राजधानी इस्लामाबाद आता जागतिक राजनैतिक घडामोडींचे केंद्र बनले आहे. शनिवार 11 एप्रिल 2026 रोजी अमेरिका आणि इराणच्या उच्चस्तरीय प्रतिनिधी मंडळांची ऐतिहासिक शांतता चर्चेसाठी भेट झाली. या अत्यंत संवेदनशील वातावरणात भारताने इराणमध्ये अडकलेल्या आपल्या 312 नागरिकांना सुरक्षितपणे बाहेर काढून एक मोठे मानवतावादी यश मिळवले आहे.