आयपीएल 2026 चा थरार प्रत्येक सामन्यागणिक वाढत चालला आहे आणि आता वेळ आहे सामना क्रमांक २२ ची, जिथे चेन्नई सुपर किंग्स आणि कोलकाता नाईट रायडर्स एकमेकांसमोर ठाकतील. चेन्नईच्या एम.ए. चिदंबरम स्टेडियमवर १४ एप्रिल रोजी होणारा हा मुकाबला दोन्ही संघांसाठी अत्यंत महत्त्वाचा आहे, कारण दोन्ही संघ सध्या खराब फॉर्मशी झुंजत आहेत. KKR गुणतालिकेत १० व्या स्थानावर असून त्यांना अजून एकही विजय मिळवता आलेला नाही, तर दुसरीकडे CSK ४ पैकी केवळ १ सामना जिंकून ९ व्या क्रमांकावर आहे. अशा परिस्थितीत, हा सामना दोन्ही संघांसाठी पुनरागमन करण्याची सुवर्णसंधी आहे. चला तर मग, या सामन्यातील तीन मोठ्या ‘प्लेअर बॅटल’वर नजर टाकूया…
हा मुकाबला अत्यंत रंजक ठरू शकतो, कारण संजू सॅमसनने गेल्याच सामन्यात दिल्ली कॅपिटल्सविरुद्ध धडाकेबाज शतक झळकावून आपल्या संघाला हंगामातील पहिला विजय मिळवून दिला होता. संजू सॅमसनने सुनील नरेनविरुद्ध १३ टी-२० डावांत ६६ धावा केल्या असून तो तीनदा बाद झाला आहे. अशातच नरेन पुन्हा एकदा सॅमसनला रोखण्याचा प्रयत्न करेल.
कर्णधार अजिंक्य रहाणेसाठी हा हंगाम आतापर्यंत फारसा खास राहिलेला नाही. पहिल्या सामन्यात अर्धशतक ठोकल्यानंतर त्याला मोठी धावसंख्या उभारता आलेली नाही. तरीदेखील अजिंक्य रहाणे आणि खलील अहमद यांच्यात जोरदार टक्कर पाहायला मिळू शकते. रहाणेने खलीलविरुद्ध ५ डावांत २५ धावा केल्या असून तो फक्त एकदाच बाद झाला आहे. यावेळी तो संघाला मजबूत सुरुवात करून देण्याचा प्रयत्न करेल.
CSK चा कर्णधार गायकवाड या हंगामात आतापर्यंत फॉर्मात दिसलेला नाही. सैनीविरुद्ध त्याने ३ डावांत १४ धावा केल्या असून तो एकदाही बाद झालेला नाही. ही लढत सामन्याची दिशा ठरवू शकते. या तीन महत्त्वाच्या लढतींवर सर्वांचे लक्ष असेल, कारण हेच खेळाडू या महत्त्वपूर्ण सामन्याचा निकाल ठरवू शकतात.
Comments are closed.