ठाणे रिंग मेट्रो : गेल्या काही वर्षांत मुंबईला लागून असलेल्या ठाणे शहराचा मोठा विकास झाला आहे. नवीन रस्ते, उड्डाणपूल, मेट्रोचे जाळे यामुळे ठाण्याचे महत्त्व दिवसेंदिवस वाढत आहे. पायाभूत सुविधांच्या उपलब्धतेमुळे ठाणे शहराला चांगलीच गती मिळाली आहे. आता ठाण्यात आणखी एक गेम चेंजर प्रकल्प सुरू झाला आहे. होय, ठाण्यातील अंतर्गत भागात गोलाकार मेट्रो धावणार असून या बांधकामाचा पहिला टप्पा घोडबंदर परिसरात सुरू झाला आहे. ठाणे शहराची वाढती वाहतूक समस्या सोडवण्याच्या दिशेने टाकलेले हे महत्त्वाचे पाऊल आहे.
ठाणे रेल्वे स्थानकावर जाण्यासाठी सध्या नागरिकांना खासगी वाहने, रिक्षा किंवा बसवर जास्त अवलंबून राहावे लागते. मात्र, ही सार्वजनिक वाहतूक व्यवस्था वाढती मागणी पूर्ण करण्यास सक्षम नाही. त्यामुळे शहरातील अंतर्गत रस्त्यांवर सतत वाहतूक कोंडी होत असल्याचे चित्र आहे. या समस्येवर कायमस्वरूपी उपाय म्हणून महाराष्ट्र मेट्रो रेल कॉर्पोरेशन लिमिटेड (महा मेट्रो) कडून सुमारे १२,००० कोटी रुपयांचा ठाणे रिंग मेट्रो प्रकल्प सुरू करण्यात आला आहे. ही मेट्रो लाईन 29 किमी लांबीची असून तिचा मार्ग गोलाकार असेल. ठाणे रिंग मेट्रो
ठाणे रिंग मेट्रो
हा मार्ग ठाण्याच्या हद्दीतून जाणार असून शहराच्या विविध भागांना जोडणार आहे. या महत्त्वाकांक्षी प्रकल्पांतर्गत एकूण 22 स्थानके उभारण्यात येणार आहेत. या स्थानकांची निवड करताना निवासी क्षेत्रे, व्यापारी केंद्रे आणि महत्त्वाच्या ट्रांझिट पॉइंट्सचा विचार करण्यात आला आहे.
रिंग मेट्रो रायला देवी, वागळे चौक, लोकमान्य नगर बस डेपो, छत्रपती शिवाजी महाराज नगर, नीळकंठ टर्मिनल आणि गांधीनगर येथे थांबेल. डॉ. काशिनाथ घाणेकर नाट्यगृह, मानपाडा, डोंगरीपाडा, विजय नगरी, वाघबील आणि पातलीपाडा स्थानके निवासी भागांशी जोडली जातील तर आझाद नगर बस डेपो, मनोरमा नगर, कोलशेत, बाळकुम नाका, राबोडी, ठाणे जंक्शन आणि नवीन ठाणे स्थानके इतर वाहतूक व्यवस्थेशी जोडली जातील. ठाणे रिंग मेट्रो
हा ठाणे रिंग मेट्रो प्रकल्प पूर्ण झाल्यानंतर ठाणे शहरातील वाहतुकीची समस्या बऱ्याच अंशी सुटणार आहे. रस्त्यांवरील वाहतूक कोंडी मोठ्या प्रमाणात कमी होईल. प्रवासाचा वेळ कमी होऊन नागरिकांचा वेळ व पैसा वाचणार आहे. सार्वजनिक वाहतूक अधिक कार्यक्षम आणि आकर्षक होईल आणि प्रदूषण कमी झाल्यामुळे पर्यावरणालाही फायदा होईल.
Comments are closed.