कर्नाटक : काँग्रेसचे आमदार विनय कुलकर्णी यांना जन्मठेपेची शिक्षा

कर्नाटकातील धारवाडमधील काँग्रेस आमदार विनय कुलकर्णी यांना 2016 च्या हायप्रोफाईल खून प्रकरणात विशेष न्यायालयाने जन्मठेपेची शिक्षा सुनावली आहे. भाजप नेते योगेश गौडा यांच्या हत्येप्रकरणी काँग्रेस आमदार विनय कुलकर्णी यांना शिक्षा झाली आहे. या प्रकरणात कुलकर्णी यांच्याशिवाय अन्य १६ आरोपींनाही अशीच शिक्षा सुनावण्यात आली आहे. बेंगळुरू येथील लोकप्रतिनिधींच्या विशेष न्यायालयाचे न्यायाधीश संतोष गजानन भट यांनी ही शिक्षा सुनावली. न्यायालयाने कुलकर्णीला भारतीय दंड संहितेच्या कलम ३०२ (हत्या) आणि १२०बी (गुन्हेगारी कट) अंतर्गत दोषी ठरवले. मात्र, शस्त्रास्त्र कायद्याच्या आरोपातून त्यांची निर्दोष मुक्तता करण्यात आली.

वास्तविक, प्रकरण १५ जून २०१६ चे आहे, जेव्हा योगेश गौडा यांची धारवाडमधील सप्तपूर परिसरात एका जिममध्ये धारदार शस्त्रांनी हत्या करण्यात आली होती. या घटनेने त्यावेळी राजकीय वर्तुळात चांगलीच चर्चा रंगली होती. प्राथमिक तपास स्थानिक पोलिसांनी केला होता, परंतु नंतर राजकीय शत्रुत्वाच्या आरोपामुळे हे प्रकरण 2019 मध्ये केंद्रीय अन्वेषण विभागाकडे सोपवण्यात आले.

न्यायालयाने 15 एप्रिल रोजी कुलकर्णी आणि अन्य आरोपींना दोषी ठरवले होते, त्यानंतर आज ही शिक्षा जाहीर करण्यात आली. फिर्यादी पक्षाने आरोपींना कोणतीही सवलत न देता जन्मठेपेची मागणी केली होती, तर बचाव पक्षाने कौटुंबिक जबाबदाऱ्यांचे कारण देत सौम्यतेचे आवाहन केले होते, जे न्यायालयाने फेटाळले होते.

या प्रकरणी धारवाड दक्षिणचे तत्कालीन उप पोलीस अधीक्षक आणि तपास अधिकारी चेन्नकेशव टिंगरीकर यांच्यासह चार पोलिसांनाही दोषी ठरवण्यात आले आहे. टिंगरीकर यांना 7 वर्षांची शिक्षा झाली आहे. कुलकर्णी आणि इतर दोषी गेल्या तीन दिवसांपासून न्यायालयीन कोठडीत होते. त्यांना जेल मॅन्युअलनुसार आवश्यक सुविधा उपलब्ध करून देण्याचे आदेश न्यायालयाने तुरुंग प्रशासनाला दिले आहेत.

कायदेतज्ज्ञांच्या मते, लोकप्रतिनिधी कायदा, 1951 मधील तरतुदीनुसार विनय कुलकर्णी यांना दोन वर्षांपेक्षा जास्त काळ तुरुंगवास भोगावा लागल्याने त्यांचे आमदारत्व आपोआप संपुष्टात येऊ शकते. कुलकर्णी यांनी 2023 च्या विधानसभा निवडणुकीत धारवाड ग्रामीण मतदारसंघातून विजय मिळवला होता आणि संपूर्ण प्रकरणात ते निर्दोष असल्याचा दावा करत आहेत.

हे देखील वाचा:

अमरावती लैंगिक अत्याचार प्रकरण: मुख्य आरोपी मोहम्मद अयाजच्या वाढदिवसाच्या सेलिब्रेशनचा व्हिडिओ व्हायरल, पोलीसही हजर!

महिला आरक्षण विधेयकावर आज मतदान, संसदेत भाजपला किती संख्याबळ?

ऑपरेशन सिंदूर नंतर भारत आणि पाकिस्तानमध्ये 4 बॅक-चॅनल बैठका: अहवालात खुलासा