ठाणे महापालिकेची पहिली सीबीएसई बोर्डाची शाळा खारेगावमध्ये ८ जूनपासून सुरू होणार आहे.

मुंबई ठाणे महानगरपालिकेची पहिली सीबीएसई बोर्ड शाळा 8 जूनपासून खारेगाव येथे सुरू होणार आहे. 'ठाणे महानगरपालिका – क्रिस्टल हाऊस' ही सीबीएसई बोर्ड स्कूल क्रिस्टल हाउस इंडियाच्या सहकार्याने चालवली जाणार आहे. या शाळेच्या माध्यमातून विद्यार्थ्यांना चांगले शिक्षण, आधुनिक सुविधा आणि सर्व प्रकारच्या विकासाच्या संधी उपलब्ध करून दिल्या जाणार आहेत. महानगर पालिका आयुक्त सौरभ राव यांनी मंगळवारी या शाळेच्या कामकाजाचा आढावा घेतला. यावेळी अतिरिक्त आयुक्त प्रशांत रोडे, उपायुक्त शिक्षण डॉ.मिताली संचेती, उपनगर अभियंता विकास ढोले, विनोद पवार, शुभांगी केसवानी व क्रिस्टलचे अधिकारी उपस्थित होते.

खारेगाव येथे सॅफायर हॉस्पिटलजवळ 'ठाणे महानगरपालिका-क्रिस्टल हाऊस स्कूल' असून ठाणे महापालिका शाळेसाठी आवश्यक पायाभूत सुविधा पुरवत आहे. त्यात ग्रंथालय, विज्ञान प्रयोगशाळा, संगणक कक्ष, भाषा प्रयोगशाळा, क्रीडा व कला विभागासाठी स्वतंत्र जागा, स्वच्छ पिण्याचे पाणी, स्वच्छतागृहे, तसेच इमारतीची देखभाल, रंगकाम, लिफ्ट, सीसीटीव्ही यंत्रणा आणि अग्निशामक यंत्रणा यांचा समावेश आहे.

ही सर्व कामे 8 जूनपूर्वी पूर्ण करण्याच्या सूचना आयुक्तांनी संबंधित विभागाला बैठकीत दिल्या.सध्या शाळेच्या इमारतीला रंगरंगोटी करणे, खिडक्यांना ग्रील्स बसवणे, क्रीडांगण तयार करणे, अग्निशमन यंत्रणा दुरुस्त करणे, लिफ्ट दुरुस्तीचे काम अंतिम टप्प्यात आले आहे. शाळा सुरू करण्याची तयारी जवळपास पूर्ण झाल्याचे बैठकीत सांगण्यात आले. क्रिस्टल हाऊस व्यवस्थापनाच्या जबाबदाऱ्यांमध्ये प्रशिक्षित शिक्षक आणि शिक्षकेतर कर्मचाऱ्यांची नियुक्ती, पूर्वप्राथमिक ते इयत्ता 12वीपर्यंतच्या विद्यार्थ्यांना मोफत शिक्षण देणे, गणवेश, पुस्तके आणि अभ्यासाचे साहित्य देणे, विद्यार्थ्यांसाठी जेवणाची व्यवस्था करणे आणि शाळेत वाहतूक सुविधा पुरवणे यांचा समावेश आहे. याशिवाय विद्यार्थ्यांना उच्च शिक्षण, करिअर मार्गदर्शन आणि रोजगारावर आधारित प्रशिक्षण देण्यावरही भर दिला जाणार आहे. आता नर्सरी ते माध्यमिकपर्यंतचे वर्ग सुरू होणार आहेत.

या उपक्रमामुळे ठाण्यातील विद्यार्थ्यांना राष्ट्रीय स्तरावरील सीबीएसई अभ्यासक्रमाचे शिक्षण मिळणार असून आर्थिकदृष्ट्या दुर्बल घटकातील विद्यार्थ्यांना चांगल्या दर्जाच्या शिक्षणाच्या नव्या संधी उपलब्ध होणार असल्याचे आयुक्तांनी सांगितले.

30 सप्टेंबर 2025 रोजी ठाणे महानगरपालिका आणि क्रिस्टल हाऊस यांच्यात सामंजस्य करारावर स्वाक्षरी करण्यात आली आहे. हा करार 30 वर्षांसाठी वैध असेल. पूर्व प्राथमिक ते बारावीपर्यंत सीबीएसई बोर्डाच्या शाळा सुरू करण्यास महापालिकेने प्रशासकीय मान्यता दिली आहे.