भाजपची राज्यसभा उमेदवारांची यादी जाहीर! ‘या’ बड्या नेत्यांना मिळाली संधी

नवी दिल्ली : भारतीय जनता पक्षाने (BJP) आगामी राज्यसभा निवडणुकीसाठी आपल्या अधिकृत उमेदवारांची घोषणा केली आहे. पक्षाने जारी केलेल्या या नव्या यादीत अनेक दिग्गज नेत्यांना संधी देण्यात आली असून, प्रादेशिक आणि सामाजिक समीकरणे साधण्याचा पुरेपूर प्रयत्न करण्यात आला आहे. यामध्ये राजस्थानमधून भाजपचे माजी प्रदेशाध्यक्ष सतीश पुनिया आणि पक्षाचे राष्ट्रीय सरचिटणीस तरुण चुग यांच्या नावांचा प्रामुख्याने समावेश आहे.

भाजपने जाहीर केलेल्या अधिकृत यादीनुसार, पक्षाने मध्य प्रदेशातून तरुण चुग आणि रजनीश अग्रवाल यांना रिंगणात उतरवले आहे. तर राजस्थानमधून सतीश पुनिया यांच्यासोबत डॉ. अलका गुर्जर यांना उमेदवारी देण्यात आली आहे. ईशान्येकडील राज्यांचा विचार करता, अरुणाचल प्रदेशमधून ताई तगाक आणि मणिपूरमधून ए शारदी देवी यांना पक्षाने तिकीट दिले आहे.

गुजरातमध्ये भाजपने राजूभाई शुक्ला, मुकेशभाई राठवा, मानसिंह परमार आणि जीतेंद्र मेघजीभाई कंजारिया या नेत्यांना राज्यसभेची उमेदवारी जाहीर केली आहे. तसेच ओडिशामधून देबाशीष सामंतराय हे पक्षाचे उमेदवार असतील. या संपूर्ण यादीमध्ये तरुण चुग हे एकमेव असे नेते आहेत, ज्यांना त्यांच्या मूळ राज्याव्यतिरिक्त (पंजाब सोडून मध्य प्रदेशातून) दुसऱ्या राज्यातून उमेदवारी देण्यात आली आहे.

Satish Poonia Profile : सतीश पुनिया यांचे भाजपमधील वाढते वजन

भाजपने राजस्थानमधून उमेदवारी दिलेले सतीश पुनिया हे पक्षातील एक खंबीर नेते मानले जातात. त्यांनी आपल्या राजकीय कारकिर्दीची सुरुवात छात्र राजकारणातून केली होती. पुनिया यांनी राजस्थान भाजपचे प्रदेशाध्यक्ष पद भूषवले असून विधानसभा निवडणुकीत त्यांनी उपनेते प्रतिपक्ष म्हणूनही जबाबदारी सांभाळली आहे.

सध्या त्यांच्याकडे हरियाणा भाजपचे प्रभारी म्हणून मोठी जबाबदारी सोपवण्यात आली आहे. जाट समाजातून येत असल्यामुळे राजस्थान आणि हरियाणा या दोन्ही राज्यांमधील सामाजिक व राजकीय समीकरणे जुळवण्यात ते अत्यंत माहीर मानले जातात. बिहार विधानसभा निवडणुकीतही पक्षाने त्यांच्यावर महत्त्वाची जबाबदारी सोपवली होती.

Tarun Chugh Role : राष्ट्रीय राजकारणातील संकटमोचक तरुण चुग

पंजाबमधील अमृतसरचे रहिवासी असलेले तरुण चुग हे अगदी लहान वयातच राष्ट्रीय स्वयंसेवक संघाशी (RSS) जोडले गेले होते. सध्या ते भारतीय जनता पक्षाचे राष्ट्रीय सरचिटणीस म्हणून कार्यरत आहेत. भाजपमध्ये त्यांना संकटमोचक आणि एक उत्कृष्ट निवडणूक रणनीतीकार म्हणून ओळखले जाते.

त्यांच्याकडे जम्मू-काश्मीर, लडाख आणि तेलंगणा यांसारख्या अत्यंत महत्त्वाच्या राज्यांचे प्रभारी म्हणून काम करण्याचा मोठा अनुभव आहे. निवडणुकांच्या काळात कार्यकर्त्यांची मोट बांधणे आणि रॅलींचे यशस्वी नियोजन करण्यात पक्षाकडून त्यांचा प्रामुख्याने वापर केला जातो.

Debasish Samantaray Odisha : बिजू जनता दल सोडून भाजपमध्ये आलेले देबाशीष सामंतराय

ओडिशातून उमेदवारी मिळालेले देबाशीष सामंतराय हे कटक परिसरातील अत्यंत तळागाळातील आणि प्रभावी नेते मानले जातात. त्यांनी नुकताच म्हणजेच मे 2026 मध्ये बिजू जनता दलाला (BJD) सोडचिठ्ठी देत भाजपमध्ये प्रवेश केला होता. विशेष म्हणजे, भाजपमध्ये प्रवेश करण्याच्या अगदी एक दिवस आधी त्यांनी आपल्या राज्यसभा खासदारकीचा राजीनामा दिला होता. सामंतराय हे यापूर्वी तीन वेळा आमदार म्हणून निवडून आलेले आहेत, ज्यामुळे ओडिशात भाजपची ताकद वाढवण्यासाठी त्यांची मदत होणार आहे.

ही बातमी वाचा:

आणखी वाचा