पंतप्रधान आजपासून सेशेल्सच्या दौऱ्यावर आहेत.

मोदी 11 वर्षांनंतर सेशेल्सला भेट देणार : 27 ते 29 जून दरम्यान वास्तव्य

वृत्तसंस्था/ नवी दिल्ली

पंतप्रधान नरेंद्र मोदी सेशेल्सच्या राष्ट्रीय दिनाच्या सुवर्ण महोत्सवी सोहळ्यात सहभागी होण्यासाठी 27 ते 29 जून दरम्यान सेशेल्सच्या दौऱ्यावर असतील. भारत आणि सेशेल्स यांच्यातील दृढ मैत्री, सागरी सहकार्य आणि परस्पर भागीदारी अधिक मजबूत करण्याच्या दिशेने हे एक महत्त्वाचे पाऊल मानले जात आहे. परराष्ट्र मंत्रालयाच्या माहितीनुसार, पंतप्रधान मोदींचा सेशेल्स दौरा राष्ट्रपती डॉ. पॅट्रिक हर्मिनी यांच्या निमंत्रणावरून होत आहे.

पंतप्रधान मोदींनी यापूर्वी 2015 मध्ये सेशेल्सला भेट दिली होती. यावर्षी सेशेल्स आपल्या राष्ट्रीय दिनाचा सुवर्ण महोत्सव साजरा करत असून, पंतप्रधान मोदी प्रमुख पाहुणे म्हणून उपस्थित राहणार आहेत. या सोहळ्यात भारतीय संरक्षण दलाची एक तुकडी आणि भारतीय नौदलाच्या दोन युद्धनौका देखील सहभागी होणार आहेत.

या दौऱ्यादरम्यान पंतप्रधान मोदी राष्ट्रपती हर्मिनी यांची भेट घेतील. दोन्ही नेते भारत आणि सेशेल्स यांच्यातील सहकार्याच्या सर्व क्षेत्रांचा आढावा घेतील आणि प्रादेशिक व आंतरराष्ट्रीय मुद्यांवर विचारांची देवाणघेवाण करतील. या दौऱ्यादरम्यान पंतप्रधान मोदी सेशेल्सच्या राष्ट्रीय सभेला संबोधित करण्यासोबतच तेथील भारतीय समुदायाच्या सदस्यांनाही भेटतील.

सामायिक इतिहास, संस्कृती आणि लोकांमधील संबंधांवर आधारित भारत आणि सेशेल्स यांचे दीर्घकाळापासून मजबूत आणि मैत्रीपूर्ण संबंध आहेत. हिंद महासागर क्षेत्रातील एक महत्त्वाचा सागरी शेजारी म्हणून भारताच्या ‘ओशन’ (सर्व प्रदेशांमध्ये सुरक्षा आणि विकासासाठी परस्पर आणि सर्वांगीण प्रगती) या संकल्पनेत आणि ‘ग्लोबल साउथ’ देशांप्रति असलेल्या आमच्या वचनबद्धतेमध्ये सेशेल्सला विशेष महत्त्व आहे.