SIR दिल्लीत सुरू, 13 हजारांहून अधिक BLO घरोघरी जाऊन मतदार यादीची पडताळणी करणार

राजकीय पक्षांचे बूथ लेव्हल एजंट मतदारांना फॉर्म भरण्यात आणि सबमिट करण्यात मदत करतील. मुख्य निवडणूक अधिकारी, दिल्लीच्या कार्यालयानुसार, ज्या मतदारांनी हा फॉर्म भरला नाही त्यांची नावे 5 ऑगस्ट रोजी प्रसिद्ध होणाऱ्या प्रारूप मतदार यादीतून काढून टाकली जातील. अधिकाऱ्यांच्या म्हणण्यानुसार, सर्व बीएलओंना सकाळी आणि संध्याकाळी मतदारांशी घरोघरी संपर्क साधण्याच्या सूचना देण्यात आल्या आहेत. कोणत्याही घराला कुलूप आढळल्यास त्यांनी किमान तीन वेळा तेथे जाऊन संपर्क साधण्याचा प्रयत्न करावा, अशा सूचनाही बीएलओंना देण्यात आल्या आहेत. SIR अंतर्गत घरोघरी जाऊन पडताळणी केल्यानंतर प्रारूप मतदार यादी ५ ऑगस्टला आणि अंतिम मतदार यादी ७ ऑक्टोबरला प्रसिद्ध केली जाईल.

याच्या एक दिवस आधी दिल्लीचे मुख्य निवडणूक अधिकारी (सीईओ) अशोक कुमार यांनी पत्रकार परिषदेत या संपूर्ण प्रकरणाची माहिती दिली होती. दिल्लीच्या मुख्य निवडणूक अधिकाऱ्यांनी सांगितले होते की, सध्याच्या प्रत्येक मतदाराला डुप्लिकेटमध्ये प्रगणना फॉर्म दिला जाईल. मतदाराने भरलेला फॉर्म बीएलओकडे जमा करून त्याची पोचपावती घ्यावी लागेल. एकही पात्र मतदार डावलला जाणार नाही आणि अपात्र व्यक्तीचा मतदार यादीत समावेश होणार नाही, याची पूर्ण काळजी घेतली जाईल, असे ते म्हणाले होते. घराला कुलूप असल्याचे आढळल्यास बीएलओ किमान ३ वेळा तेथे जाण्याचा प्रयत्न करतील. मतदार यादीचा मसुदा 5 ऑगस्ट रोजी प्रसिद्ध करण्यात येणार असल्याची माहिती त्यांनी दिली. 5 ऑगस्ट ते 4 सप्टेंबर या कालावधीत दावे आणि हरकती दाखल करता येतील. यासोबतच 3 ऑक्टोबरपर्यंत सर्व दावे व हरकती निकाली काढण्यात येतील.