पोरांचा हात तोडला, डोकी फोडलात, लेकीबाळींचे कपडे फाडणार? संसदेत अखिलेश यादवांचा रुद्रावतार

संसदेत विरोधकांची निदर्शने : संसदेच्या पावसाळी अधिवेशनादरम्यान, नीट पेपरफुटी आणि कॉकरोच जनता पक्षाच्या समर्थकांवर झालेल्या लाठीचार्जवरून विरोधी पक्षांनी गदारोळ केला. समाजवादी पक्षाचे प्रमुख अखिलेश यादव यांनी लोकसभेत विचारले, “20 जुलै रोजीच्या संसद मोर्चादरम्यान मुलींचे कपडे फाडण्याचा अधिकार पोलिसांना कोणी दिला?”

विरोधी पक्षांचे खासदार काळे कपडे घालून संसदेत

संसदीय कामकाज मंत्री किरेन रिजिजू म्हणाले की, नीट पेपरफुटीवर सभागृहात चर्चा करण्यास सरकार तयार आहे. ते म्हणाले की, चर्चा नियमांच्या चौकटीतच व्हायला हवी. सर्व पक्षांशी सल्लामसलत करून अध्यक्षांची नियुक्ती केली पाहिजे. तरुणांच्या भविष्यासाठी अर्थपूर्ण चर्चा झाली पाहिजे. लोकसभेचे कामकाज सकाळी 11 वाजता सुरू झाले, परंतु गदारोळामुळे केवळ एका मिनिटानंतर ते तहकूब करण्यात आले. दुपारी 12 वाजता कामकाज पुन्हा सुरू झाले, परंतु गदारोळामुळे सुमारे पाच मिनिटांनंतर ते पुन्हा दुपारी 2 वाजेपर्यंत तहकूब करण्यात आले. राज्यसभेचे कामकाजही दुपारी 2 वाजेपर्यंत तहकूब करण्यात आले. दरम्यान, राहुल गांधी यांच्यासह काँग्रेस आणि इतर विरोधी पक्षांचे खासदार काळे कपडे घालून संसदेत दाखल झाले. संसदेचे कामकाज सुरू होण्यापूर्वी एका पत्रकार परिषदेत भाजप नेते रविशंकर प्रसाद म्हणाले की, राहुल गांधी विद्यार्थ्यांच्या मुद्द्याचे राजकारण करत आहेत.

लोकसभेचे कामकाज दुपारी दोन वाजेपर्यंत तहकूब

पावसाळी अधिवेशनादरम्यान सुरू असलेल्या गदारोळामुळे बुधवारी लोकसभेचे कामकाज दुसऱ्यांदा तहकूब करण्यात आले. सभागृहाचे कामकाज दुपारी दोन वाजता पुन्हा सुरू होईल. विद्यार्थ्यांवरील पोलीस कारवाई, पेपरफुटी आणि केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीवरून विरोधी पक्ष आंदोलन करत आहेत. काँग्रेसचे खासदार के. सी. वेणुगोपाल यांनी लोकसभेत सांगितले की, विरोधी पक्षांची मागणी स्पष्ट आहे, केंद्रीय शिक्षणमंत्री धर्मेंद्र प्रधान यांनी राजीनामा द्यावा. यावर उत्तर देताना संसदीय कामकाज मंत्री किरेन रिजिजू म्हणाले की, सरकार गेल्या तीन दिवसांपासून सातत्याने सांगत आहे की ते नीट पेपरफुटीच्या मुद्द्यावर चर्चा करण्यास तयार आहे. त्यांनी सांगितले की, सरकारला नियमांच्या चौकटीत राहून अर्थपूर्ण चर्चा हवी आहे, जेणेकरून देशातील तरुण आणि शिक्षण व्यवस्थेशी संबंधित मुद्द्यांवर सविस्तर चर्चा करता येईल.

इतर महत्वाच्या बातम्या