IND vs ZIM: भारतीय संघात दीर्घ प्रतिक्षेनंतर पुनरागमन केल्यावर मयंक यादव भावुक! जाणून घ्या नेमकं काय म्हणाला?

भारत आणि जिम्बाब्वे (Team india vs Zimbabwe) यांच्यात 3 सामन्यांच्या टी-20 मालिकेतील पहिला सामना 23 जुलै रोजी हरारे स्पोर्ट्स क्लब मैदानावर खेळला गेला. या सामन्याच्या भारतीय प्लेइंग इलेव्हनमध्ये वेगवान गोलंदाज मयंक यादवला (Mayank Yadav) बऱ्याच दिवसांनी संधी मिळाली होती. आयपीएल 2024 मध्ये आपल्या वेगवान गोलंदाजीमुळे चर्चेत आलेल्या मयंक यादवने सर्वांचे लक्ष वेधून घेतले होते, ज्यामुळे त्याला लवकरच भारतीय संघात खेळण्याची संधीही मिळाली.

मात्र, पाठीच्या दुखापतीमुळे आणि फिटनेसच्या इतर समस्यांमुळे तो बऱ्याच काळापासून संघाबाहेर होता. आयपीएल 2026 च्या हंगामातही मयंक यादव केवळ 4 सामने खेळू शकला होता. आता आंतरराष्ट्रीय क्रिकेटमध्ये पुनरागमन केल्यानंतर दिलेल्या निवेदनात त्याने आपल्या वेदनाही व्यक्त केल्या आहेत.

झिम्बाब्वेविरुद्धच्या पहिल्या टी-20 सामन्यात मयंक यादवने सामन्याच्या पहिल्याच चेंडूवर विकेट घेत आपल्या पुनरागमनाची शानदार घोषणा केली. या सामन्यात त्याने आपल्या 4 षटकांच्या गोलंदाजीमध्ये केवळ 18 धावा देत 2 विकेट्स घेतल्या. या शानदार कामगिरीसाठी मयंकला ‘प्लेयर ऑफ द मॅच’चा पुरस्कार मिळाला. आपल्या निवेदनात तो म्हणाला की, स्वतःला प्रेरित ठेवणे खूप कठीण होते. हा दोन वर्षांचा कालावधी माझ्यासाठी खूप आव्हानात्मक होता. त्या काळात गोष्टी अजिबात माझ्या बाजूने नव्हत्या, कारण मी तेव्हा फक्त 22 किंवा 23 वर्षांचा होतो. वयाच्या त्या टप्प्यावर मला इतके काही पाहावे लागले. मला पुनरागमन करण्यासाठी स्वतःला प्रेरित ठेवावे लागले, आणि देशासाठी खेळण्यासाठी परतणे हीच माझ्यासाठी सर्वात मोठी प्रेरणा होती.

टी-20 आंतरराष्ट्रीय सामन्यांमध्ये मयंक यादव आता अशा भारतीय गोलंदाजांच्या यादीत सामील झाला आहे, ज्यांनी 2 किंवा त्याहून अधिक वेळा डावाच्या पहिल्याच चेंडूवर विकेट घेतली आहे. मयंक यादवची ही कामगिरी करण्याची ही दुसरी वेळ आहे. यापूर्वी त्याने 2024 मध्ये बांगलादेशविरुद्धच्या सामन्यात अशी कामगिरी केली होती. टी-20 आंतरराष्ट्रीय सामन्यात डावाच्या पहिल्याच चेंडूवर 2 किंवा त्याहून अधिक वेळा विकेट घेणारा मयंक यादव हा भारताचा चौथाच गोलंदाज ठरला आहे.

त्याच्याशिवाय भुवनेश्वर कुमारने तीन वेळा, तर हार्दिक पंड्या आणि अर्शदीप सिंग यांनी प्रत्येकी दोन वेळा हा विक्रम केला आहे.