भारतीय क्रिकेट संघ श्रीलंकेविरुद्धच्या दोन सामन्यांच्या कसोटी मालिकेच्या तयारीमध्ये व्यस्त असतानाच, ऑस्ट्रेलिया आणि बांगलादेश यांच्यातही दोन सामन्यांची कसोटी मालिका सुरू आहे. या मालिकेतील पहिला सामना डार्विन येथे खेळला जात असून आज खेळाचा दुसरा दिवस आहे. बांगलादेशने या सामन्यावर आपली पकड मजबूत केली आहे.
बांगलादेशी फलंदाज तन्झिद हसन तमीमने आपल्या कसोटी कारकिर्दीतील पहिले शतक झळकावत एक शानदार खेळी साकारली. विशेष म्हणजे, त्याने ही कामगिरी ऑस्ट्रेलियाच्या भूमीवर करून इतिहास रचला आहे. ऑस्ट्रेलियामध्ये कसोटी शतक ठोकणारा तो पहिला बांगलादेशी फलंदाज ठरला आहे.
यापूर्वी कोणत्याही बांगलादेशी फलंदाजाला ऑस्ट्रेलियाच्या भूमीवर कसोटी क्रिकेटमध्ये शतक झळकावता आले नव्हते. तन्झिद हसन तमीमने 197 चेंडूत 101 धावांची उत्कृष्ट खेळी केली. अखेरीस नॅथन लायनच्या गोलंदाजीवर मिचेल स्टार्कने त्याचा झेल घेतला आणि तो बाद झाला; मात्र, बाद होण्यापूर्वी त्याने बांगलादेशला मजबूत स्थितीत आणले होते.
या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला. मात्र, हा निर्णय चुकीचा ठरला. बांगलादेशी गोलंदाजांसमोर ऑस्ट्रेलियन संघाचा डाव 53 षटकांत केवळ 198 धावांत आटोपला.
त्यानंतर, बांगलादेशने फलंदाजी करताना भक्कम सुरुवात केली. पहिल्या विकेटसाठी 36 धावांची आणि दुसऱ्या विकेटसाठी 102 धावांची भागीदारी झाली. त्यानंतर, शांतो आणि तन्झिद हसन तमीम यांनी तिसऱ्या विकेटसाठी 93 धावांची भागीदारी केली.
तन्झिद तिसरी विकेट म्हणून बाद होण्यापूर्वीच बांगलादेशने केवळ दोन विकेट्सच्या बदल्यात ऑस्ट्रेलियावर आघाडी घेतली होती. तरीही, त्याच्या शानदार शतकामुळे बांगलादेशची स्थिती अत्यंत मजबूत झाली आहे. या बातमीखेरीस बांगलादेश 279/3 अश्या स्थितीत आहे. संघाने 81 धावाची आघाडी घेतली आहे.
Comments are closed.