बँकिंग सुधारणांसाठी उच्चस्तरीय समिती

केंद्रीय अर्थमंत्री निर्मला सीतारामन यांची माहिती

वृत्तसंस्था/ नवी दिल्ली

बँकिंग क्षेत्रातील सुधारणांवर काम करण्यासाठी सरकार लवकरच उच्चस्तरीय समिती नेमणार आहे. अर्थमंत्री निर्मला सीतारामन यांनी सोमवारी नवी दिल्लीत आयोजित दोन दिवसीय ‘पीएसबी कॉन्फ्लुएन्स 2026’च्या पहिल्या दिवशी ही घोषणा केली. अर्थ मंत्रालयातील उच्चस्तरीय अधिकाऱ्यांच्या माहितीनुसार, ही समिती याच महिन्यात स्थापन केली जाऊ शकते. ही उच्चस्तरीय समिती स्थापन करण्याचा प्रस्ताव सर्वप्रथम 2026-27 च्या केंद्रीय अर्थसंकल्पात मांडण्यात आला होता.

विकसित भारतासाठी बँकिंगवर एक उच्चस्तरीय समिती स्थापन करण्याची योजना अर्थमंत्री सीतारामन यांनी जाहीर केली. 2047 पर्यंत भारताला एक विकसित राष्ट्र बनवण्यात बँकांच्या भूमिकेवर ही समिती लक्ष केंद्रित करेल, असे अर्थमंत्र्यांनी स्पष्ट केले. देशाच्या आर्थिक विकासाच्या उद्दिष्टांशी बँकिंग क्षेत्राचे पुनरावलोकन करणे आणि त्याला सुसंगत करणे हा या समितीचा मुख्य उद्देश आहे. तथापि, या समितीची औपचारिकपणे स्थापना होणे बाकी आहे.

देशाच्या बँकिंग क्षेत्रातील सुधारणा आणि मालमत्तेच्या गुणवत्तेचा संदर्भ देत अर्थमंत्र्यांनी नवीन बदलांची गरज अधोरेखित केली. समितीने आपला अहवाल सादर केल्यानंतर सुचवलेल्या शिफारशींची अंमलबजावणी करण्यास सरकार विलंब करणार नाही, असे आश्वासन सीतारामन यांनी दिले. समितीने आपला अहवाल सादर करताच आम्ही त्याच्या शिफारशींवर वेगाने काम करू, असे त्या म्हणाल्या.