पश्चिम रेल्वेच्या तिकीट तपासणीतून १०० कोटींहून अधिक वसूल!

तिकीटविरहित आणि अनियमित प्रवासाला आळा घालण्यासाठी पश्चिम रेल्वेने एप्रिल ते ऑगस्ट 2026 या कालावधीत तिकीट तपासणी मोहिमेद्वारे 100.42 कोटी रुपयांचा दंड वसूल केला आहे. या कालावधीत, रेल्वेने 13.47 लाख तिकीट नसलेले आणि अनियमित प्रवासी पकडले. यामध्ये बुक न केलेल्या सामानाशी संबंधित प्रकरणांचाही समावेश आहे.

ऑगस्ट 2026 मध्ये पश्चिम रेल्वेची कारवाई अधिक तीव्र झाली. या महिन्यातच 2.13 लाखांहून अधिक तिकीट नसलेले आणि अनियमित प्रवासी पकडले गेले. या प्रकरणांतून रेल्वेने १७.१६ कोटी रुपयांचा दंड वसूल केला.

मुंबई उपनगरीय रेल्वे नेटवर्कमध्येही तिकीट तपासणी मोहिमेदरम्यान मोठ्या प्रमाणात अनियमित प्रवास आढळून आला. एप्रिल ते ऑगस्ट 2026 दरम्यान तिकीटविना किंवा अनियमित प्रवासाची 4.65 लाख प्रकरणे नोंदवली गेली. यातून पश्चिम रेल्वेने २५.६५ कोटी रुपये वसूल केले.

पश्चिम रेल्वेच्या म्हणण्यानुसार, मुंबईच्या उपनगरीय नेटवर्कमध्ये सातत्याने होत असलेली ही कारवाई अधिकृत तिकिटांसह प्रवास सुनिश्चित करण्यासाठी आणि प्रवासाची शिस्त मजबूत करण्याच्या दिशेने एक महत्त्वाचे पाऊल आहे.

पश्चिम रेल्वेने एसी उपनगरीय लोकल गाड्यांमध्ये सामान्य तिकिटांद्वारे अनधिकृत प्रवास करणाऱ्यांवर विशेष नजर ठेवली आहे. एप्रिल ते ऑगस्ट 2026 या कालावधीत एसी लोकल सेवांमध्ये सुमारे 78,600 दंडात्मक प्रकरणे नोंदवण्यात आली होती. त्यापैकी 3.26 कोटी रुपये वसूल करण्यात आले.

गेल्या वर्षी याच कालावधीत सुमारे 36,480 प्रकरणांमधून 1.20 कोटी रुपये वसूल करण्यात आले होते. या आधारावर, एसी उपनगरीय सेवांमध्ये दंड वसुलीत सुमारे 172 टक्के लक्षणीय वाढ नोंदवली गेली.

तिकीट तपासणी कर्मचाऱ्यांच्या प्रयत्नांचे कौतुक करताना पश्चिम रेल्वेने सांगितले की, या मोहिमांचा उद्देश केवळ रेल्वेच्या महसुलाचे रक्षण करणे नाही तर प्रवाशांमध्ये तिकीट काढण्याची आणि अधिकृत पद्धतीने प्रवास करण्याची सवय वाढवणे हा आहे.

रेल्वेच्या म्हणण्यानुसार, सध्या सुरू असलेल्या तिकीट तपासणी मोहिमेमुळे अनधिकृत प्रवासाला आळा घालण्यात, महसूल गळती कमी करण्यात आणि तिकीट प्रणालीमध्ये पारदर्शकता वाढण्यास मदत होत आहे. पश्चिम रेल्वे नेटवर्कवरील प्रवाशांना अधिक सुव्यवस्थित आणि उत्तम प्रवासाचा अनुभव सुनिश्चित करण्यातही ते योगदान देत आहे.