Iran US Conflict – इराण कोणत्याही दबावाखाली येऊन आपल्या अटी सोडणार नाही, मसूद पेजेश्कियान संयुक्त राष्ट्रांच्या महासभेत उठवणार आवाज

इराण आणि अमेरिका यांच्यातील संघर्ष सुरूच आहे. या पार्श्वभूमीवर इराणचे राष्ट्राध्यक्ष मसूद पेजेश्कियान संयुक्त राष्ट्र महासभेच्या व्यासपीठावर आपल्या देशाची बाजू मांडण्यासाठी न्यूयॉर्ककडे रवाना झाले आहेत. इराण कोणत्याही दबावाखाली येऊन आपल्या अटी सोडणार नाही, असे प्रवासाला निघण्यापूर्वी पेजेश्कियान यांनी स्पष्ट केले. पेजेश्कियान या जागतिक व्यासपीठावरून करारांचे कथित उल्लंघन, इराणी जनतेच्या तक्रारी आणि क्षेत्रीय संघर्षांवर आवाज उठवणार आहेत. ज्यामुळे त्यांच्या या संबोधनाकडे संपूर्ण जगाचे लक्ष लागले आहे.

अमेरिका आणि त्यांच्या मित्र राष्ट्रांच्या दबावा दरम्यान कडक संदेश देत पेजेश्कियान यांनी स्पष्ट केले की, ताकदीच्या जोरावर इराणच्या जनतेला आत्मसमर्पणासाठी भाग पाडले जाऊ शकत नाही. मंगळवारी संयुक्त राष्ट्र महासभेच्या सत्रात सहभागी होण्यासाठी ते रवाना झाले. इराणी सरकारी माध्यमांच्या माहितीनुसार, ते आंतरराष्ट्रीय पातळीवर इस्लामिक रिपब्लिक ऑफ इराणचा दृष्टिकोन आणि त्यांच्या तक्रारी जगासमोर मांडणार आहेत.

अल जझीराच्या वृत्तानुसार, निघण्यापूर्वी बोलताना पेजेश्कियान यांनी सांगितले की, ते इराणी लोकांच्या तक्रारी, अलीकडील घडामोडी आणि त्यामुळे निर्माण झालेला अविश्वास हे महत्त्वाचे मुद्दे उपस्थित करणार आहेत. इराण अनेकदा वाटाघाटीच्या टेबलावर येऊन करारांवर स्वाक्षऱ्या करत असला, तरी त्यानंतर दिलेली आश्वासने पाळण्यात अपयश आल्याचा दावा त्यांनी केला. गाझा, पॅलेस्टाईन, सीरिया, येमेन आणि इराणसह विविध प्रदेशांत सुरू असलेल्या संघर्षांचा संदर्भ देत, विरोधी पक्ष सैन्याव्यतिरिक्त इतर मार्गांचा वापर करून इराणवर दबाव आणत असल्याचे पेजेश्कियान म्हणाले.

वाहतूक मार्ग रोखणे, अंतर्गत असंतोष भडकवणे, प्रसारमाध्यमांचा गैरवापर करणे आणि वांशिक मुद्यांवर फूट पाडणे यांसारख्या उपायांद्वारे देशाला कमकुवत करण्याचे प्रयत्न सुरू असल्याचा गंभीर आरोप त्यांनी केला. देशाच्या अंतर्गत कमकुवतपणाचा फायदा घेऊन जनतेवर दबाव आणणे हा यामागचा उद्देश असल्याचे त्यांनी नमूद केले. दरम्यान, अमेरिका आणि इराण यांच्यात चर्चेची शक्यता वर्तवली जात असून, अमेरिकेचे राष्ट्राध्यक्ष डोनाल्ड ट्रम्प यांनी संयुक्त राष्ट्रांच्या महासभेच्या निमित्ताने पेजेश्कियान यांची भेट घेण्याची शक्यता फेटाळलेली नाही. मात्र, दोन्ही देशांमधील करारासंदर्भातील अनेक वादग्रस्त मुद्दे अद्यापही कायम आहेत.