वेस्ट इंडिजविरुद्ध रोहित-कोहली रचणार इतिहास? वनडेमध्ये ‘ही’ कामगिरी करणारी पहिली जोडी बनण्याची संधी

भारत आणि वेस्ट इंडिज संघामध्ये 27 सप्टेंबरपासून तीन सामन्यांच्या वनडे मालिकेला सुरुवात होत आहे, ज्यातील पहिला सामना तिरुअनंतपुरमच्या ग्रीनफिल्ड इंटरनॅशनल स्टेडियमवर खेळवला जाईल. या सामन्याची भारतीय क्रिकेट चाहते अत्यंत उत्सुकतेने वाट पाहत आहेत, कारण बऱ्याच काळानंतर विराट कोहली आणि रोहित शर्मा एकत्र मैदानात खेळताना दिसणार आहेत. पुढील वर्षी होणाऱ्या वनडे वर्ल्ड कपच्या दृष्टीने या मालिकेत कोहली आणि रोहितच्या फॉर्मवर सर्वांचे लक्ष असेल. तसेच या मालिकेत कोहली आणि रोहितला एकत्र मिळून अशी एक कामगिरी करण्याची संधी आहे, जी आतापर्यंत वेस्ट इंडिजविरुद्ध कोणतीही जोडी करू शकलेली नाही.

​रोहित शर्मा आणि विराट कोहलीने जेव्हा जेव्हा एकत्र फलंदाजी केली आहे, तेव्हा त्यांनी कोणताही न कोणताही विक्रम नक्कीच रचला आहे. आता वेस्ट इंडिजविरुद्धच्या या वनडे मालिकेत जर विराट कोहली आणि रोहित शर्मा यांनी एकत्र मिळून आणखी 18 धावा केल्या, तर ते वेस्ट इंडिजविरुद्ध वनडेमध्ये भागीदारी म्हणून 1000 धावा पूर्ण करणारी पहिलीच जोडी ठरतील. आतापर्यंत वनडेमध्ये एकाही जोडीला हा पराक्रम करता आलेला नाही. अशा परिस्थितीत कोहली-रोहितला एकत्र इतिहास रचण्याची मोठी संधी आहे. कोहली आणि रोहितने आतापर्यंत वेस्ट इंडिजविरुद्ध 15 सामन्यांमध्ये एकत्र फलंदाजी केली असून 70.14 च्या सरासरीने 982 धावा केल्या आहेत. यादरम्यान त्यांच्यात 4 शतकी आणि २ अर्धशतकी भागीदाऱ्या झाल्या आहेत.

​वेस्ट इंडिजविरुद्ध आंतरराष्ट्रीय क्रिकेटमध्ये सर्वाधिक धावा करण्याच्या बाबतीत विराट कोहली सध्या दुसऱ्या क्रमांकावर आहे. या तीन सामन्यांच्या वनडे मालिकेत जर त्याने 271 धावा केल्या, तर तो अव्वल स्थानी असलेल्या जॅक कॅलिसला मागे टाकेल. कोहलीने आतापर्यंत तिन्ही फॉरमॅट मिळून वेस्ट इंडिजविरुद्ध 3850 धावा केल्या आहेत, तर जॅक कॅलिसच्या नावावर 4120 धावांची नोंद आहे.