Ratnagiri News – समुद्रात बुडणाऱ्या पर्यटकांना वाचवण्यासाठी पाच हायटेक ‘रोबोटिक वॉटर क्राफ्ट’ पोलीस दलात दाखल

रत्नागिरी जिल्ह्यातील समुद्रकिनाऱ्यांवर पर्यटनाचा आनंद लुटताना पर्यटक बुडून होणाऱ्या दुर्दैवी दुर्घटनांना आळा घालण्यासाठी जिल्हा प्रशासनाने अत्यंत महत्त्वाचे व आधुनिक पाऊल उचलले आहे. समुद्रातील बुडणाऱ्यांना तात्काळ जीवनदान मिळावे यासाठी जिल्हा नियोजन समितीच्या माध्यमातून खरेदी करण्यात आलेले ५ अत्याधुनिक ‘रोबोटिक वॉटर क्राफ्ट’ आज जिल्हा पोलीस दलाकडे सुपूर्द करण्यात आले. “गतिमान प्रशासन तथा आपत्कालीन व्यवस्थेचे बळकटीकरण करणे” या नाविन्यपूर्ण योजनेअंतर्गत ही अत्याधुनिक उपकरणे उपलब्ध करून देण्यात आली आहेत.

गेल्या पाच वर्षांत १४३ पर्यटकांचा मृत्यू रत्नागिरीच्या समुद्रकिनाऱ्यांवर दरवर्षी देश-विदेशातून लाखो पर्यटकांची मांदियाळी असते. मात्र, समुद्राचा अंदाज न येणे, भरती-ओहोटीच्या वेळांची माहिती नसणे किंवा पाण्याचा तीव्र प्रवाह यामुळे मागील पाच वर्षांत तब्बल १४३ निष्पाप पर्यटक व नागरिकांचा मृत्यू झाला आहे. ही गंभीर बाब लक्षात घेऊन भविष्यातील अमूल्य मानवी जीव वाचवण्यासाठी तातडीचे बचावकार्य करता यावे, या उद्देशाने या ‘लाईफ सेव्हिंग’ रोबोटिक वॉटर क्राफ्ट्सचा समावेश यंत्रणेत करण्यात आला आहे.

हे रोबोटिक वॉटर क्राफ्ट पर्यटकांची सर्वाधिक गर्दी असणाऱ्या किनाऱ्यांवर तैनात केले जाणार आहेत. त्यामध्ये गणपतीपुळे,दापोली (मुरुड-लाडघर पट्टा),गुहागर आणि आरे-वारे याठिकाणांचा समावेश आहे.समुद्रात संकटात सापडलेल्या व्यक्तीपर्यंत प्रतिकूल हवामानातही हे रोबोट्स वेगाने पोहोचू शकतात, ज्यामुळे आपत्ती व्यवस्थापन विभागाची कार्यक्षमता दुपटीने वाढणार आहे.