कौशल्य प्रशिक्षण संस्था या आयआयटी आणि आयआयएमपेक्षा कमी नाहीत: मोदी

शांघाय येथे आयोजित ४८व्या जागतिक कौशल्य स्पर्धेत सहभागी झालेल्या भारतीय संघाच्या प्रतिनिधींशी मोदींनी त्यांच्या ७, लोककल्याण मार्ग येथील निवासस्थानी संवाद साधला. आंतरराष्ट्रीय व्यासपीठावर भारताचे प्रतिनिधित्व केल्याबद्दल त्यांनी सहभागींचे अभिनंदन केले आणि त्यांना देशातील कौशल्य विकासाचे राजदूत होण्यासाठी प्रोत्साहित केले.

शैक्षणिक पदव्यांइतकीच व्यावहारिक कौशल्ये महत्त्वाची आहेत, असे पंतप्रधान म्हणाले. त्यांनी तरुणांना आंतरराष्ट्रीय बाजारपेठेच्या गरजा पूर्ण करण्यासाठी आणि उदयोन्मुख तंत्रज्ञानाशी ताळमेळ राखण्यासाठी कौशल्ये विकसित करण्यास सांगितले.

भारताला कुशल मानव संसाधनांचे जागतिक केंद्र बनवण्यासाठी युवक, सरकार आणि प्रशिक्षण संस्थांना एकत्र काम करावे लागेल, असे मोदी म्हणाले. स्पर्धेदरम्यान मिळालेले अनुभव आणि सूचना सरकारसोबत शेअर कराव्यात, जेणेकरून देशातील कौशल्य प्रशिक्षण प्रणालीमध्ये आणखी सुधारणा करता येईल, असे आवाहन त्यांनी केले. स्पर्धेदरम्यान नवीन उपकरणे, सॉफ्टवेअर, तांत्रिक प्रणाली आणि कामाच्या प्रक्रियेशी जुळवून घेण्याचे त्यांचे अनुभव सहभागींनी शेअर केले. कौशल्य विकासासाठी सरकारकडून होत असलेल्या प्रयत्नांचाही त्यांनी उल्लेख केला.

शांघाय येथे 22 ते 27 सप्टेंबर दरम्यान झालेल्या 48 व्या जागतिक कौशल्य स्पर्धेत भारत 10 व्या स्थानावर राहिला. भारतीय संघाने सहा रौप्य पदके आणि उत्कृष्टतेची 20 पदके जिंकली. 70 सदस्यांच्या भारतातील आतापर्यंतच्या सर्वात मोठ्या तुकडीने 63 कौशल्य श्रेणींमध्ये या स्पर्धेत भाग घेतला. या संभाषणात कौशल्य विकास आणि उद्योजकता राज्यमंत्री (स्वतंत्र प्रभार) आणि शिक्षण राज्यमंत्री जयंत चौधरी आणि केंद्र सरकारचे वरिष्ठ अधिकारीही उपस्थित होते.