बेंगळूर : कर्नाटक लोकसेवा आयोगाच्या (केपीएससी) पशुवैद्यकीय अधिकारी भरती घोटाळ्याप्रकरणी अंमलबजावणी संचालनालयाने (ईडी) तपास तीव्र झाला आहे. या प्रकरणात अटक करण्यात आलेल्या आयोगाच्या सदस्या बी. व्ही. गीता यांनी त्यांच्यावरील आरोप फेटाळून लावत घोटाळ्याची जबाबदारी माजी अध्यक्ष शिवशंकरप्पा साहुकार यांच्यावर असल्याचे सांगितल्याचे वृत्त आहे.
भरती प्रक्रियेत कथित गैरव्यवहार झाल्याच्या आरोपांनंतर ईडीकडून या प्रकरणाची चौकशी सुरू असून संबंधित व्यक्तींच्या भूमिकेचा तपास केला जात आहे. पशुवैद्यकीय अधिकारी भरती प्रक्रियेत उमेदवारांना परीक्षा होण्यापूर्वीच उत्तरांचा पुरवठा करण्यात आल्याचा गंभीर आरोप आहे. तसेच नोकरी मिळवून देण्याचे आश्वासन देऊन उमेदवारांकडून पैसे घेतल्याचाही संशय व्यक्त करण्यात आला आहे. भरती प्रक्रियेत आपली कोणतीही भूमिका नसल्याचे गीता यांनी सांगितल्याचे वृत्त असून त्यांनी तपास अधिकाऱ्यांचे लक्ष माजी अध्यक्ष शिवशंकरप्पा साहुकार यांच्या कथित भूमिकेकडे वेधल्याचे समजते. मात्र, या आरोपांची स्वतंत्रपणे पुष्टी झालेली नसून तपासातूनच वस्तुस्थिती स्पष्ट होणार आहे.
जानेवारी 2026 मध्ये झालेल्या पशुवैद्यकीय अधिकारी भरती परीक्षेपूर्वी काही उमेदवारांना उत्तरे उपलब्ध झाली होती, असा आरोप आहे. तत्कालीन केपीएससी परीक्षा नियंत्रक आणि आयएएस अधिकारी ज्ञानेंद्र कुमार यांच्याकडून उत्तरे मिळवून ती उमेदवारांपर्यंत पोहोचविण्यात आली होती का, याचाही तपास सुरू असल्याचे वृत्त आहे. काही उमेदवारांच्या उत्तरपत्रिका आणि आयोगाने जाहीर केलेल्या अधिकृत उत्तरसूचीची तुलना करताना विसंगती आढळल्याचे सांगितले जात आहे. या बाबींच्या आधारे तपास यंत्रणा कथित उत्तरफुटीचा आणि भरती प्रक्रियेतील अनियमिततेचा मागोवा घेत आहे.
Comments are closed.