सकाळी उठल्यावर असो किंवा दिवसभराचा थकवा दूर करण्यासाठी, आपण सर्वप्रथम चेहरा धुतो. काही जणांना थंड पाण्याने चेहरा धुणे आवडते, तर काही जण कोमट पाण्याचा वापर करतात. विशेषतः हिवाळ्यात गरम पाण्याने चेहरा धुण्याची सवय अनेकांना असते. मात्र, तुम्हाला माहीत आहे का, पाण्याचे तापमान तुमच्या त्वचेवर परिणाम करू शकते? खूप गरम पाण्यामुळे त्वचेचा नैसर्गिक ओलावा कमी होऊ शकतो, तर थंड पाणी चेहऱ्याला तात्पुरता ताजेतवानेपणा देऊ शकते. मग चेहरा धुण्यासाठी नेमके कोणते पाणी वापरावे? हे जाणून घेणं महत्वाचं आहे.
कोणते पाणी योग्य?
चेहरा धुण्यासाठी सामान्य तापमानाचे किंवा किंचित कोमट पाणी हा चांगला पर्याय ठरतो. यामुळे त्वचा स्वच्छ करताना अतिशय गरम किंवा बर्फासारख्या थंड पाण्यामुळे होणारा त्रास टाळता येऊ शकतो. त्वचेचा प्रकारही यामध्ये महत्त्वाचा असतो. संवेदनशील किंवा कोरडी त्वचा असल्यास पाण्याचे तापमान निवडताना अधिक काळजी घ्यावी.
गरम पाणी वापरल्यास
थंड हवामानात गरम पाण्याने चेहरा धुणे आरामदायी वाटू शकते. मात्र, खूप गरम पाणी त्वचेतील नैसर्गिक तेल कमी करू शकते. त्यामुळे त्वचा कोरडी पडणे, खाज सुटणे किंवा लालसरपणा आणि जळजळ जाणवणे अशा समस्या उद्भवू शकतात. विशेषतः ज्यांची त्वचा आधीपासून कोरडी किंवा संवेदनशील आहे, त्यांनी अतिशय गरम पाणी वापरणे टाळावे.
थंड पाण्याने धुण्याचे फायदे
थंड पाण्याने चेहरा धुतल्यामुळे ताजेतवाने वाटू शकते. सकाळी झोपेतून उठल्यानंतर चेहऱ्यावरील सूज काही काळ कमी दिसण्यासही मदत होऊ शकते. मात्र, हा परिणाम तात्पुरता असतो. थंड पाणी वापरल्याने त्वचेची छिद्रे कायमची बंद होतात किंवा मुरुम पूर्णपणे नाहीसे होतात, असा समज करून घेऊ नये. अतिशय थंड पाणी किंवा थेट बर्फ चेहऱ्यावर लावल्याने संवेदनशील त्वचेला त्रास होऊ शकतो.
कोमट पाणी
चेहरा स्वच्छ करण्यासाठी किंचित कोमट पाणी सोयीचे ठरू शकते. त्वचेवरील धूळ, घाम आणि अतिरिक्त तेल स्वच्छ करण्यासाठी ते मदत करते. यासोबत त्वचेच्या प्रकारानुसार सौम्य क्लिन्झर वापरल्यास चेहरा स्वच्छ ठेवता येतो. मात्र, कोमट पाणी म्हणजे खूप गरम पाणी नव्हे. पाणी चेहऱ्याला आरामदायी वाटेल इतकेच कोमट असावे.
चेहरा धुताना थंड पाणी वापरावे की गरम, यापेक्षा त्वचेला अनुकूल तापमानाचे पाणी वापरणे अधिक महत्त्वाचे आहे. साधारणपणे सामान्य तापमानाचे किंवा किंचित कोमट पाणी चेहरा स्वच्छ करण्यासाठी योग्य ठरते.
Comments are closed.