रोहित-विराटचा अनोखा जल्लोष, चॅम्पियन्स ट्रॉफी जिंकल्यानंतर मैदानावर दांडिया..!

By Marathi On Mar 10, 2025

यंदाच्या आयसीसी चॅम्पियन्स ट्राॅफीचा फायनल सामना भारत विरूद्ध न्यूझीलंड संघात खेळला गेला. या सामन्यात भारताने न्यूझीलंडचा 4 गडी राखून पराभव केला. भारतीय फिरकीपटूंच्या तगड्या गोलंदाजीच्या जोरावर भारताने चॅम्पियन्स ट्रॉफीच्या फायनल सामन्यात न्यूझीलंडला धूळ चारून विजेतेपद पटकावले.

या विजयाने संपूर्ण भारत आनंदाने भरून गेला आहे. या विजयासह, क्रिकेटच्या मैदानावर भारतीय स्टार फलंदाज विराट कोहली (Virat Kohli) आणि कर्णधार रोहित शर्मा (Rohit Sharma) यांची मैत्रीपूर्ण शैली दिसून आली. विजयानंतर, दोन्ही खेळाडूंनी हातात स्टंप घेऊन दांडिया खेळून आनंद साजरा केला.

अनेकदा रोहित शर्मा आणि विराट कोहली यांच्या सेलिब्रेशनचे व्हिडिओ सोशल मीडियावर व्हायरल होतात. या चॅम्पियन्स ट्रॉफीच्या फायनल सामन्यात, रोहित आणि विराट अनेक वेळा मैदानावर रणनीती बनवताना एकत्र दिसले. कर्णधार रोहित शर्माच्या अर्धशतकाच्या जोरावर भारताने फायनल सामन्यात शानदार विजय मिळवत आयसीसी चॅम्पियन्स ट्रॉफी जिंकली.