आयपीएल 2025 चा 48वा सामना दिल्ली कॅपिटल्स आणि कोलकाता नाईट रायडर्स यांच्यात खेळला गेला. या सामन्यात दिल्ली संघाला पराभवाचा सामना करावा लागला. दिल्लीतील अरुण जेटली स्टेडियमवर खेळल्या गेलेल्या या सामन्यात कोलकाता नाईट रायडर्सचे फिरकीपटू सुनील नारायण आणि वरुण चक्रवर्ती यांनी त्यांच्या फिरकीची जादू दाखवली, ज्यामुळे केकेआरच्या 204 धावांचा पाठलाग करताना दिल्ली कॅपिटल्सचे फलंदाज केवळ 190 धावा करू शकले. अशाप्रकारे, कोलकाता संघाने प्लेऑफमध्ये प्रवेश करण्याच्या आशा जिवंत ठेवल्या.
कोलकाताकडून सुनील नारायणने सर्वाधिक बळी घेतले. त्याने 4 षटकांत 29 धावा देत 3 बळी घेतले. यासह, नारायणने टी20 क्रिकेटमध्ये एक मोठा टप्पा गाठला. खरं तर, नारायणने टी-20 क्रिकेटमध्ये संघासाठी सर्वाधिक विकेट्स घेण्याच्या विक्रमाची बरोबरी केली आहे. आतापर्यंत हा विक्रम इंग्लंडचा डॅशिंग अष्टपैलू समित पटेलच्या नावावर होता. आता नारायणने समित पटेलची बरोबरी केली आहे.
कोलकाता नाईट रायडर्सकडून खेळताना सुनील नारायणने टी20 क्रिकेटमध्ये 208 विकेट्स घेतल्या आहेत. त्याच वेळी, समित पटेलने नॉटिंगहॅमशायरकडून टी-20 क्रिकेटमध्ये 208 विकेट्स घेतल्या आहेत. त्यानंतर हॅम्पशायरचा ख्रिस वूड येतो. त्याने हॅम्पशायरकडून टी20 क्रिकेटमध्ये 199 विकेट्स घेतल्या आहेत.
टी 20 क्रिकेटमध्ये संघासाठी सर्वाधिक विकेट घेणारा गोलंदाज
208- सुनील नारायण (कोलकाता नाईट रायडर्स)
208 – सामित पटेल (नॉटिंगहॅमशायर)
199- ख्रिस वूड (हॅम्पशायर)
195- लसिथ मालिंगा (मुंबई इंडियन्स)
193- डेव्हिड पेन (ग्लॉस्टरशायर)
सुनील नारायण आयपीएलमध्ये सर्वाधिक विकेट घेणाऱ्या गोलंदाजांच्या यादीत चौथ्या क्रमांकावर आहे. नारायणने 186 आयपीएल सामन्यांपैकी 184 डावात 190 विकेट्स घेतल्या आहेत. त्याच्या पुढे फक्त युजवेंद्र चहल, भुवनेश्वर कुमार आणि पियुष चावला आहेत. या हंगामात, नारायणला आयपीएलमध्ये 200 बळी पूर्ण करण्याची उत्तम संधी असेल. आता फक्त युजवेंद्र चहलने आयपीएलमध्ये 200 बळी घेण्याचा विक्रम केला आहे.
आयपीएलच्या इतिहासात सर्वाधिक विकेट घेणारा गोलंदाज
214- युझवेंद्र चहल
193 – भुवनेश्वर कुमार
192 – पियुष चावला
190 – सुनील नारायण*
185 – रविचंद्रन अश्विन
183 – ड्वेन ब्राव्हो
Comments are closed.