हवाई दलाचे प्रमुख पंतप्रधानांशी चर्चा करतात

पाकिस्तानवर कारवाई करण्यापूर्वी उच्चस्तरीय आढावा बैठक

वृत्तसंस्था/ नवी दिल्ली

भारतीय हवाई दलाचे प्रमुख एअर चीफ मार्शल अमरप्रीत सिंग यांनी रविवारी पंतप्रधान नरेंद्र मोदी यांची भेट घेतली. सुमारे 40 मिनिटे चाललेल्या बैठकीनंतर हवाई दल प्रमुख पंतप्रधान निवासस्थानाबाहेर पडले. जम्मू काश्मीरमधील पहलगाम येथे झालेल्या दहशतवादी हल्ल्याच्या पार्श्वभूमीवर आणि राष्ट्रीय सुरक्षेशी संबंधित बाबींच्या पार्श्वभूमीवर ही बैठक अत्यंत महत्त्वाची मानली जात आहे.

हवाई दल प्रमुखांपूर्वी शुक्रवारी सायंकाळी नौदल प्रमुख अॅडमिरल दिनेश के. त्रिपाठी यांनीही पंतप्रधानांची लोक कल्याण मार्गावरील त्यांच्या निवासस्थानी भेट घेतली होती. नौदल प्रमुखांनी पंतप्रधान मोदींसोबत एक तास बैठक करत नौदलाच्या सध्याच्या तयारी आणि उपक्रमांची माहिती दिली. दरम्यान, भारत आणि पाकिस्तानमधील वाढत्या तणावाच्या पार्श्वभूमीवर, देशभरातील लष्करी तयारी लक्षात घेता, ऑर्डनन्स फॅक्टरी बोर्डाने सर्व कर्मचाऱ्यांच्या रजा तात्काळ रद्द केल्या आहेत. राष्ट्रीय स्तरावर संरक्षण तयारी सर्वोच्च पातळीवर पोहोचली असताना हे पाऊल उचलण्यात आले आहे.

पंतप्रधानांचा बैठकांचा सपाटा

पहलगाम दहशतवादी हल्ल्यानंतर पंतप्रधान नरेंद्र मोदी यांनी पाकिस्तानविरुद्ध संभाव्य लष्करी कारवाईची कमान हाती घेतली आहे. पाकिस्तानमध्ये असलेल्या दहशतवाद्यांवर भारताच्या संभाव्य कारवाईसाठी रोडमॅप तयार करण्यासाठी ते तिन्ही सशस्त्र दलांच्या प्रमुखांसोबत स्वतंत्र बैठका घेत आहेत.

26 एप्रिल रोजी पहिल्यांदाच पंतप्रधान मोदींनी संरक्षणमंत्री राजनाथ सिंग, राष्ट्रीय सुरक्षा सल्लागार अजित डोभाल, सीडीएस जनरल अनिल चौहान आणि तिन्ही सैन्याच्या प्रमुखांसोबत महत्त्वाची बैठक घेतली. ही बैठक सुमारे दीड तास चालली. या बैठकीत पंतप्रधान मोदींनी सर्व दलांना पाकिस्तानविरुद्ध कारवाई करण्याचे पूर्ण स्वातंत्र्य असल्याचे स्पष्टपणे सांगितले होते. तसेच भारताच्या प्रत्युत्तराची वेळ, पद्धत आणि लक्ष्य हे सशस्त्र दल स्वत: ठरवतील. त्यादृष्टीने आवश्यक सर्व अडथळे दूर करून, राजकीय नेतृत्वाकडून अचूक आणि संतुलित प्रतिसाद दिला जाईल असे संकेतही दिले आहेत.

लष्करप्रमुखांशीही चर्चा

30 एप्रिल रोजी पाकिस्तानविरुद्ध कारवाईच्या शक्यतेदरम्यान, लष्करप्रमुख जनरल उपेंद्र द्विवेदी यांनी पंतप्रधान मोदींची त्यांच्या 7 लोक कल्याण मार्ग येथील निवासस्थानी भेट घेतली. यावेळी परराष्ट्रमंत्री डॉ. एस. जयशंकर आणि एनएसए अजित डोभाल हे देखील उपस्थित होते.