IPL 2025: “त्याला दुसरी संधी देऊ नका…” फ्लॉप-शो नंतर करून नायर सोशल मीडियावर प्रचंड ट्रोल!

यंदाच्या आयपीएल हंगामातील 55वा सामना सोमवारी (5 मे) दिल्ली कॅपिटल्स आणि सनरायझर्स हैदराबाद (DC vs SRH) संघात हैदराबादच्या स्टेडियमवर रंगला होता. या सामन्यात करुण नायरला ‘गोल्डन डक’ मिळाला. त्याने दिल्ली कॅपिटल्सच्या डावाची सुरुवात फाफ डू प्लेसिससोबत केली. पण सामन्याच्या पहिल्याच चेंडूवर पॅट कमिन्सने (Pat Cummins) त्याला विकेटमागे झेलबाद केले. या हंगामातील पहिल्या सामन्यात 89 धावांची शानदार खेळी केल्यानंतर तो सतत फ्लॉप होत आहे, त्यानंतर सोशल मीडियावर त्याला वाईटरित्या ट्रोल करण्यात आले. लोक त्याच्या जुन्या ट्विटची खिल्ली उडवत आहेत.

आयपीएल 2025 पूर्वी, करुण नायरने (Karun Nair) देशांतर्गत क्रिकेटमध्ये चांगली कामगिरी केली होती. 6 कसोटी, 2 वनडे सामने खेळणाऱ्या नायरने 2017 मध्ये शेवटचा आंतरराष्ट्रीय सामना खेळला. (10 डिसेंबर 2022) रोजी करुण नायरने ट्विट केले, “प्रिय क्रिकेट, मला आणखी एक संधी द्या.” देशांतर्गत क्रिकेटमधील त्याच्या चांगल्या कामगिरीनंतर, चाहते देखील त्याचे कौतुक करत होते आणि बीसीसीआयने त्याला संधी द्यावी अशी मागणी करत होते. परंतु आयपीएल 2025 मध्ये सतत अपयशी ठरल्यानंतर, आता त्याला ट्रोल केले जात आहे.

(13 एप्रिल) रोजी त्याने मुंबई इंडियन्सविरुद्ध 89 धावांची खेळी खेळली, हा त्याचा या हंगामातील पहिला सामना होता. पण त्यानंतर तो राजस्थानविरुद्ध शून्यावर बाद झाला. 89 धावांच्या खेळीनंतर त्याने 6 डावात अवघ्या 65 धावा केल्या आहेत.एका वापरकर्त्याने त्याच्या ट्विटप्रमाणेच त्याला ट्रोल केले आणि लिहिले, “प्रिय क्रिकेट, कृपया त्याला दुसरी संधी देऊ नका.” दुसऱ्या वापरकर्त्याने लिहिले, “कसोटीत एकदा आश्चर्यचकित झालो, आयपीएल 2025 मध्ये एकदा आश्चर्यचकित झालो, पण पीआर गेम म्हणतो की तो ब्रॅडमन आहे.”

करुण नायरच्या रूपात पहिली विकेट पडल्यानंतर, तिसऱ्या षटकात पॅट कमिन्सने फाफ डू प्लेसिसलाही 3 धावांवर बाद केले. अभिषेक पोरेल 8 धावा, केएल राहुल 18 धावा, अक्षर पटेल 6 धावा हे देखील स्वस्तात बाद झाले. दिल्ली कॅपिटल्सचा अर्धा संघ 29 धावांवर पॅव्हेलियनमध्ये परतला. ट्रिस्टन स्टब्स 41 आणि आशुतोष शर्मा 41 धावा यांनी सन्मान वाचवला आणि दिल्लीची धावसंख्या 133 पर्यंत नेली.

पावसामुळे सनरायझर्स हैदराबादचा (SRH) डाव सुरू होऊ शकला नाही आणि सामना रद्द करण्यात आला. दोन्ही संघांना 1-1 गुण मिळाला, जरी हैदराबादला कोणत्याही परिस्थितीत विजय आवश्यक होता. पण आता हैदराबादचा संघ आयपीएल 2025च्या प्लेऑफच्या शर्यतीतून बाहेर पडला आहे.