खेलो इंडिया युवा स्पर्धा; जलतरणात महाराष्ट्राला सप्तपदक,एक सुवर्ण, एक रौप्य, तर 5 कांस्य पदकांची कमाई

जलतरणात सलग दुसऱयांदा आदिती हेगडेने सुवर्णपदकाची लूट करीत सातव्या खेलो इंडिया युवा क्रीडा स्पर्धेत महाराष्ट्रासाठी पदकाचे खाते उघडले. आदितीच्या 1 सुवर्णासह 1 रौप्य व 4 कांस्य पदकांची कमाई करीत महाराष्ट्राने सोमवारी पदकाची सप्तमी साजरी केली.

गया शहरातील बीआयपीएआरडीच्या जलतरणात तलावावर अपेक्षेप्रमाणे महाराष्ट्राच्या जलतरणपटूंनी पदकांची लयलूट केली. आदिती हेगडेने 1 सुवर्ण, 1 कांस्य, समाईरा मल्होत्राने 1 रौप्य, तर शुभम जोशी, झारा बक्षी, वेदांत तांदळे, ऋजुता राजाज्ञा यांनी कांस्य पदके जिंकून आजचा दिवस गाजविला.

मुलींच्या 100 मीटर बेस्ट स्ट्रोक प्रकारात महाराष्ट्राचा डबल धमाका बघायला मिळाला.  मुंबईच्या समाईरा मल्होत्रा व झारा बक्षी यांनी अनुक्रम रुपेरी व कांस्यपदकाला गवसणी घातली. कर्नाटकच्या मानवी वर्माने सुवर्णपदक जिंकले. मुलांच्या 100 मीटर बेस्ट स्ट्रोक प्रकारात ठाण्याच्या शुभम जोशीने कांस्यपदकाची कमाई केली. कर्नाटकच्या क्रीश सुकुमारने सुवर्ण पदकाचा पल्ला पार केला.

मुलांच्या 50 मीटर  बटरफ्लाय प्रकारात पुण्याच्या जलतरणपटूंनी महाराष्ट्रासाठी पदकांचा करिश्मा घडविला. मुलांच्या गटात पदार्पणातच वेदांत तांदळेने कांस्यपदकावर नाव कोरले. मुलींच्या गटात ऋजुता राजाज्ञाने सलग दुसऱ्या स्पर्धेत पदक जिंकण्याचा पराक्रम केला. गत स्पर्धेत तिने 2 सुवर्णपदके जिंकली होती. वेदांत व ऋजुता हे दोघे पुण्यातील डेक्कन जीमखाना तलावावर सराव करीत आहेत.

आदितीची शतक सेकंदाने बाजी

मुलींच्या 200 मीटर फ्रीस्टाईल प्रकारात मुंबईच्या आदिती हेगडेने 2 मिनिटे 9.51 सेकंद वेळेत शर्यत पूर्ण करून महाराष्ट्रासाठी स्पर्धेतील पहिले पदक जिकले. चुरशीच्या शर्यतीत शतांश सेकंदाच्या फरकाने दिल्लीच्या तितिक्षा रावतला मागे टाकून आदितीने बाजी मारली. तितिक्षाला 2 मिनिटे 9.58 सेकंद वेळेसह रौप्यपदकावर समाधान मानावे लागले. याचबरोबर 800 मीटर फ्रीस्टाईल प्रकारात आदितीला कांस्यपदकावर समाधान मानावे लागले. आदितीचे खेलो इंडिया स्पर्धेतील हे सहावे पदक ठरले. गत तामीळनाडू स्पर्धेत तिने पदकाचा चौकार झळकविला होता. मुंबईतील खेलो इंडिया अॅकडमीत ती सराव करत असते.