‘युवराज सिंगपेक्षाही सरस खेळतो अभिषेक…’, टी20वर्ल्ड कप दरम्यान भारतीय दिग्गज खेळाडूचा मोठा दावा!

गेल्या काही दिवसांत टी-२० वर्ल्ड कपमधील खराब फॉर्ममुळे अभिषेक शर्मा टीकेच्या घेऱ्यात होता. मात्र, झिम्बाब्वेविरुद्धच्या ‘करो या मरो’च्या सामन्यात ५५ धावांची खेळी खेळून त्याने आपल्या टीकाकारांची तोंडे बंद केली आहेत. पाकिस्तानचा माजी क्रिकेटपटू मोहम्मद आमिरचा तो व्हिडिओ सोशल मीडियावर खूप व्हायरल झाला होता, ज्यामध्ये त्याने अभिषेकला ‘लप्पेबाज’ (फक्त बॅट फिरवणारा) म्हटले होते. मात्र, आता या वादात रविचंद्रन अश्विननेही उडी घेतली असून, त्याने मोहम्मद आमिरच्या विधानावर तीव्र नाराजी व्यक्त केली आहे.

​रविचंद्रन अश्विनने मोहम्मद आमिरच्या त्या व्हिडिओचा उल्लेख केला, ज्यामध्ये त्याने अभिषेक शर्माला ‘लप्पेबाज’ म्हटले होते. अश्विनने आमिरवर निशाणा साधताना म्हटले की, तो अभिषेकच्या खेळण्याच्या पद्धतीवर प्रश्न उपस्थित करू शकतो, परंतु तो ‘लप्पेबाज’ तर अजिबात नाही.

​अश्विन म्हणाला, “आजच्या काळात सर्वात उत्कृष्ट ‘बॅट स्विंग’ असलेल्या फलंदाजांपैकी अभिषेक शर्मा एक आहे. आपल्या सर्वांना माहीत आहे की युवराज सिंग त्याचा मार्गदर्शक (मेंटॉर) आहे. कदाचित अभिषेकचा बॅट स्विंग युवराजपेक्षाही सरस आहे. तुमचा बॅट स्विंग यापेक्षा चांगला असूच शकत नाही.”

​भारताच्या या माजी फिरकीपटूने (अश्विनने) पुढे म्हटले की, अभिषेक जेव्हा जेव्हा चेंडू मारतो तेव्हा तो खूप लांब जातो. म्हणूनच काही लोक त्याला ‘लप्पेबाज’ समजण्याची चूक करू शकतात. अश्विनने अभिषेकची एक चूकही बोलून दाखवली की, तो प्रत्येक चेंडूवर मोठा शॉट खेळण्याचा प्रयत्न करतो.

​अभिषेक शर्मा त्याच्या टी-२० वर्ल्ड कप कारकिर्दीतील पहिल्या तिन्ही डावांत ‘शून्य’वर बाद झाला होता. तर दक्षिण आफ्रिकेविरुद्धच्या सुपर-८ सामन्यात त्याने खाते तर उघडले, पण तिथेही तो केवळ १५ धावा करून बाद झाला. मात्र, जेव्हा भारतीय संघाला अभिषेककडून मोठ्या खेळीची सर्वात जास्त गरज होती, तेव्हा त्याने ५५ धावांची खेळी करून फॉर्ममध्ये परतल्याचे संकेत दिले. झिम्बाब्वेला पराभूत केल्यानंतर भारतीय संघ आता सेमीफायनलच्या शर्यतीत कायम आहे.