200+ धावांच्या लक्ष्याचा पाठलाग करताना अभिषेक शर्मा फेल; आकडेवारी पाहून बसेल धक्का!

ऑकलंडमध्ये न्यूझीलंडविरुद्ध खेळल्या गेलेल्या चौथ्या टी-20 सामन्यात भारतीय संघाला 87 धावांनी पराभवाचा सामना करावा लागला. प्रथम फलंदाजी करताना न्यूझीलंडने 20 षटकांत 7 गडी गमावून 259 धावा केल्या. या अवाढव्य लक्ष्याचा पाठलाग करताना भारताची आघाडीची फळी पूर्णपणे अपयशी ठरली; ज्यामध्ये अभिषेक शर्माचाही समावेश होता, जो 15 चेंडूत 27 धावा करून बाद झाला.

विशेष म्हणजे, 200 किंवा त्यापेक्षा जास्त धावांच्या लक्ष्याचा पाठलाग करताना अभिषेक शर्मा संघर्ष करत असल्याची ही पहिलीच वेळ नाही. याआधीही अनेक प्रसंगी, जेव्हा समोर मोठे लक्ष्य असते, तेव्हा अभिषेकची बॅट शांतच राहिली आहे.

आकडेवारी अत्यंत बोलकी आहे: टी-20 क्रिकेटमध्ये जेव्हा जेव्हा अभिषेक 200 हून अधिक धावांच्या लक्ष्याचा पाठलाग करण्यासाठी मैदानात उतरला आहे, तेव्हा तो 30 धावांचा टप्पाही ओलांडू शकलेला नाही. अशा महत्त्वाच्या प्रसंगी त्याची कामगिरी न उंचावणे ही भारतीय संघासाठी चिंतेची बाब ठरत आहे.

आतापर्यंत, अभिषेकने 200 हून अधिक धावांच्या लक्ष्याचा पाठलाग करताना 8 डावांत फलंदाजी केली आहे. यापैकी दोन डावांत तो खाते न उघडताच बाद झाला, तर केवळ तीन वेळा तो 20 धावांचा टप्पा ओलांडू शकला.

याउलट, न्यूझीलंडविरुद्धच्या तिसऱ्या टी-20 सामन्यात जिथे भारताने 199 धावांचे लक्ष्य केवळ 13.2 षटकांत यशस्वीपणे गाठले होते. अभिषेकची बॅट तळपली होती. त्याने 38 चेंडूत नाबाद 113 धावांची खेळी केली होती, ज्यामध्ये 9 चौकार आणि 11 षटकारांचा समावेश होता. या शानदार कामगिरीसाठी त्याला ‘प्लेअर ऑफ द मॅच’ हा किताब देण्यात आला होता. मात्र, त्यानंतरच्याच सामन्यात, जेव्हा लक्ष्य 200 धावांच्या पुढे गेले, तेव्हा अभिषेकची बॅट पुन्हा शांत झाली.

200 हून अधिक धावांच्या लक्ष्याचा पाठलाग करताना अभिषेक शर्माची कामगिरी

१७ (८)
0 (1)
0 (1)
१० (७)
३ (५)
२९ (२४)
२९ (१२)
२७ (१५)

अभिषेक शर्मा हा एक आक्रमक फलंदाज म्हणून ओळखला जातो. त्याने आतापर्यंत 221 टी20 सामने खेळले असून, 217 डावांमध्ये 33.16 च्या सरासरीने आणि 179.27 च्या स्ट्राईक रेटने 6633 धावा केल्या आहेत.